namal67@gmail.com

namal67@gmail.com
සටහන් පෙළගැස්ම‍ Prabath Rajasooriya

Wednesday, August 1, 2018

සංගීතඥ ආර් ඒ චන්ද්‍රසේන ජීවන තතු - අංක 05

එදවස දෙසවන් නැළවු සත්සර රන්ස්‌වරය  - (1924-1980) - 05 වන යොමුව


ඔහු තමන්ගේ වාද්‍ය වෘන්දයේ පළපුරුදු දක්‍ෂ එක්‌තරා චරිතයක්‌ කෙරෙහි ඇසගසාගෙන සිටියේය ඉන් දශකයකට පමණ ඔබ්බෙන් කන්ද උඩරට තම ගම් පියසේ දී තමා විසින්ම ක්‍ෂේත්‍රයට පිවිසෙන්නට අතදුන් ඔහු දැන් සංගීත විෂය පිළිබඳ ගුරුවරයෙකු බවට පත් ව ඈත වෙල්ලස්‌සේ බදුඵ පුරවරයේ ශිල්ප සතර බෙදාදීමේ නිරතව සිටියේය එය එසේ නමුදු ගීත පටිගතකිරීම් සඳහා සහභාගි වන්නට සති අන්තයේ නිතිපතා අගනුවරට සේන්දු වී මරදානේ චන්ද්‍රසේන සංගීතායතනයේ නැවතී සිටියේය ඔහු එවක ඩී වී රත්නායක නමින් හැඳින්වු පසුව හෙළ ගී කෙත අස්‌වද්දන්නට මල් වරුසා බඳු නිරමාණ ගොන්නක්‌ දායාද කළ ආචාර්ය වික්‌ටර් රත්නායකයන්ය


මේ යුගයෙන් පස්‌වසකට පමණ පෙරදී කන්ද උඩරට  සෙකංඩගලපුරයේ වැව් කොමළිය හමා එන මන්ද මාරුතයේ පහස ලත් කැන්ඩි ලේක්‌ ක්‌ලබ් හී චන්ද්‍රසේනයන්ගේ ආශීර්වාදයෙන් සිය හඞ අවදිකල වික්‌ටර් ඔහු ගේ අමයුරු නැවුම් ගී රස සුවඳ වහනය කරවු  සිහිල් සුළං රැල්ලේ ගීතය නිසා රටතොට හැඳිනගත්තෙක්‌ බවට පත් වි සිටියේය

තමන්ගේ අනුවේදනීය කථාපුවත හකුඵවා දැක්‌වූ නිර්මාණ ද්විත්වයටම ජීවය කවා ඒවා ජනප්‍රිය කරවීමේ අතිශය අවදානම් භාරදුර කටයුත්ත ඔහුට පැවරීමට චන්ද්‍රසේනයන් තීරණය කොට තිබිණි

එහි සෙසු ගීත සඳහා පාසල් සිසු දිවිය හමාර කරන්නට සුදානම්ව සිටි තමන්ගේ දෙටු දියණිය වු තිලංගනී ව  තොරාගන්නට ඔහු තීරණය කලේ මේ ව්‍යාපාරික කටයුත්තේ අවදානම නොබියව අධිෂ්ඨානශීලිව භාරගනිමිනි ඇයගේ සමවයසේ වෙනත් දියණියක්‌ වු චම්පා අතපත්තු ද ඇයට සහය දැක්‌වීමට තෝරාගනු ලැබීය 

නවක ගායකයන් අවශ්‍ය බවට පුවත්පතක පළකරනු ලැබු දැන්විමකට අනුව සිය දෙමව්පියන් සමග චන්ද්‍රසේන සංගීතායතනය වෙත පියනැගූ මෙකි පාසල් සිසුවිය පසුව එහි ද සිසුවියක්‌ බවට පත්විය

දැරියන් දෙදෙනා වෙනුවෙන් තෝරාගත් නිර්මාණ මාස ගණනාවක්‌ දැඩි විනයක්‌ මධ්‍යයේ පුහුණකරවන්නට චන්ද්‍රසේනයන් වගබලා ගත්තේ මරදානේ තම නිවස කුඩා ආදර්ශ ශබ්දාගාරයක්‌ බවට තමා විසින්ම පත්කරගැනීමෙනි  ගීත පටිගතකිරීමේ තාක්‍ෂණය හා ඒ හැ බැඳුනු සෙසු කටයුතු පිළිබඳව ඔහුට තිබුණු පුඵල් අවබෝධය ඊට රුකුලක්‌ වන්නට ඇතැයි කිවමනාය

නිවස සාලය හරහා ආලින්දය දක්‌වා රැහැන් ඇද මයික්‍රපෝන සවිකර තිබිනි  දැරියන් ගේ හඩ ඇතුඵ කාමරයේ සවිකර ඇති ස්‌පිකර ඔස්‌සේ මනාව ශ්‍රවණය කල හැකිය ස්‌වර උසුරුවීමේ හඩ උස්‌පහත් විමේ අඩුපාඩු එයින් නිසිලෙස අධීක්‍ෂණය කල හැකිය 

සීලවිමලයන් අතින් පබැඳුනු තවත් ගීතයක්‌ ඔහු විසින් සුවිශේෂී කටයුත්තකට වෙන්කරවාගෙන තිබුනි  එවකට රටතොට කණින් කොණ දොරින් දොර ජනප්‍රසාදය අත්කරගනිමින් පැවතුණු  කණ්‌ඩායම් ගී කලාවේ නිරත වු යව්වනයන් පිරිසක්‌ වු  රේමන්ඩ් ෆොන්සේකා 

නිහාල් සිල්වා සහ රෝයි ෆොන්සේකා සමනළයෝ නමින් ගායක කන්ඩායමක්‌ බිහිකරවාගෙන පිලිප්ස්‌  ලේබලයෙන් වෙළඳ තැටියක්‌ නිකුත්කරාවාගෙන තිබුනු අතර  එහි 

නැළවෙන මවු උකුලේ පොඩි දරුවන් දෙතොළේ ගීතය විසින් ඔවුහු ශ්‍රාවක ගරු සැළිකිලි බුහුමන් ලබමින් සිටියහ

නැළවෙන මව් උකුලේ ......

පොඩි දරුවන් දෙතොලේ.......

සුරතල් සිගිති සිනා මැවෙන කලේ......

කිරි ඉතිරේ........

ඔන්චිල්ල චිල්ල මලේ.......

වැල්ලේ නෙල්ලි කැලේ ......

නිදියාගන්න පුතේ.......

මවගේ තුරුල්ලේ................
---------------------
පද සංකල්පනය- රේමන්ඩ් ෆොන්සේකා
තනුව - නිහාල් සිල්වා
සංගීත අධ්‍යක්‍ෂණය - ආර් ඒ චන්ද්‍රසේන
වාද්‍ය වෘන්දය සහ සංගීතය මෙහෙයවීම - ආර් ඒ චන්ද්‍රසේන
තැටි ලේබලය - සූරිය 
----------------------------

සවන්දෙන්න මෙතැනින්
--------------------------

පිලිප්ස්‌ සහ සූරිය තැටි ලේබල් ව්‍යාපාරිකයන් විසින් ආරධනා ලැබු ඔවුන් නවතම තැටියක්‌ නිකුත් කරන්නට කටයුතු සුදානම් කරමින් සිටි අතර එහි සත්සර මුසුව සඳහා ඔවුහු චන්ද්‍රසේනයන්ගේ සහය පැතීය

ඒ අනුව සූරිය තැටි ලේබලයේ සී එච් බී 007 අනුක්‍රමික අංකය වෙන්වුනේ සමණළයෝ වෙනුවෙනි සංගීත සංයෝජනය ලේබලය ඉදිරියේ  ආර් ඒ චන්ද්‍රසේන නාමය සටහන් විය

මේ සුහදශීලී නිහතමානී යව්වනයන් ගේ ගැයුම් මිහිර අගයනු ලැබු ඔහු ඔවුන් සිය වාද්‍ය වෘන්දය වෙත බඳවාගන්නට යුහුසුඵ විය

සිය කුඵඳුල් තැටියේ පෙළගැස්‌වුණු ගීත අතරින් එකක්‌ ඔවුන් සඳහා වෙන්කෙරවාදෙන්නටද ඔහු ඉටාගත්තේය


ලස්‌සනට පිපුණු වනමල් ගල් පීරෙන දියවැල්.......

මං ආසා කරණ මැණික්‌ කැටේ නිල් .......

දුර ඈත කැලේ ගල් ගුහාවක වෙසෙනවා කල්......

ලස්‌සන මගේ කිරිල්ලි සුරතල්..........

---------------------
පද සංකල්පනය- සරත් මුණසිංහ
තනුව - ආර් ඒ චන්ද්‍රසේන
සංගීත අධ්‍යක්‍ෂණය - ආර් ඒ චන්ද්‍රසේන
වාද්‍ය වෘන්දය සහ සංගීතය මෙහෙයවීම - ආර් ඒ චන්ද්‍රසේන
තැටි ලේබලය - පිලිප්ස්‌
----------------------------
මෙතැනින් සවන්දෙන්න


ඉන් වසර පහකට පමණ ඉහත කාලයකදී තමා විසින් ක්‍ෂේත්‍රයට හඳුන්වාදුන් නිහාල් නෙල්සන් නම් නව යව්වනයා ගේ දගකාර හඞ කැටිවුනු ඒ ගීතය ද ගුවන් විදුලියෙන් ප්‍රචාරය වෙමින් පැවතිනු අතර එකී තරුණයා උදෙසා තවත් අවස්‌ථාවක්‌ උදාකර දෙන්නට ඔහු නොපැකිළි විය

යළි හමුවෙමු ...........................

(විශේෂ ස්තුතිය - දර්ශනී චන්ද්රසේන මහත්මිය - ආර් ඒ චන්ද්රසේන කණිටු දියණිය)

Wednesday, July 11, 2018

සියවසකට පෙර යුගයක අතීතාවලෝකනය - 1929

දුක දන්නේ දුක විඳින්නේ  පෙම්වතියමයි මේ ලොකේ .......................අතීත රස මියෑසියක විසිතුරු  - 1950

මේ සිදුවිම් පෙළ දිගහැරෙන්නේ අදින් සියවස්‌ දෙවිස්‌සක දුරාතීතයේ හෙළදිව් අගනුවර වු අනුරපුරය ඇසුරෙනි








එවක මෙහි භූපාලයාණෝ දක්‍ෂිණ දඹදිව් වැසියෙකු වු දැහැමි එළාර රාජයානන් ය ලක්‌දිවට ආගන්තුකයෙකු වුවත් තුන්හෙළයේ පිහිටි රට පාලකයා වු ඔහුගේ රාජ්‍ය සේවයේ යෙදුනුවුන් අතර වංශවත් මෙන්ම සාමාන්‍ය  හෙළයන් ද විය


ඔවුනතර මිත්‍ර නමින් හැඳින්වු සෙන්පතියා සුවිශේෂී චරිතයකි ඔහු එතුමාගේ යුධ සේනාකංයක පරිපාලනය භාරව සිටි ජව සම්පන්න දක්‍ෂ නිලදරුවෙකු විය

මීට සමකාලීනව තුන්හෙළයේ රුහුණු බිම නරපතියා වු කාකවණ්‌ණතිස්‌ස කැළණි පුරවරයේ නාග ගෝත්‍රික කැළණීතිස්‌ දියණි අබිසවෙර හෙවත් වෙහෙර දේවිය හා සරණ බන්ධන ගතව සිටියේය ඒ දෙපොළ ගේ දෙටු පුතු අභය ගාමිණි සහ කණිටු සැදැහැතිස්‌ ඇතුඵ පිරිසගේ තෙදබල මහිමය රජරට සිමා මායිම තෙක්‌ පැතිර පැවතිනි

අතුල සහ උපනන්ද ප්‍රාණ සරි මිතුරන්ය එසේම ඔවුහූ රුහුණුදේශ වැසි කාවන්තිස්‌ මිහිපාලයා ගේ යුධභට සේනාංකයන් භාරව සිටි සෙන්පතියන්ය

මිත්‍ර ගේ සහයකයකු හමුවේ අයුක්‌ති සහගත ලෙස ඝාතනය ට ලක්‌වු රටවැසියෙකු වෙනුවෙන් මැදිහත් වූ උපනන්දයන් හට ඔවුන්ගේ  අත්අඩංගුවට පත්වන්නට සිදුවෙයි තමා වෙනුවෙන් මීට මැදිහත් නොවන ලෙස සිය මිතුරා වු අතුලයන් වෙත ඔහුගෙන් කෙරෙන ආයචනයකට හිස නැමීම නිසා මිතුරා වෙනුවෙන් කිසිවක්‌ කරන්නට අපොහොසත්ව ඔහු අසරණ වෙයි

සෙන්පති අතුල විසින් මේ සිදුවිම අනුරපුර එළාර රාජ අධිකරණ සභාවට පැමිණිලි කරමින් යුක්‌තිය පසඳාදෙන ලෙස කෙරෙන ඉල්ලීම පරිභවයෙන් ඉවත දමන්නේ එහි පරිපාලක භරණ විසිනි එයින් නොසන්සුන්ව කෝප ගත් අතුල භරණට සිය කාය ශක්‌තිය පෙන්වයි

ආරක්‍ෂක භට සේනාවන් විසින් ලුහුබැඳඑද්දී අතුල රෝහණ සිටුවරයාගේ මන්දිරයේ රැකවරණ පතයි ඔහු ගේ පෙම්බර දියණිය වු රෝහිණී නවයොවුන් වියේ පටන් අතුළ ගේ පෙම්වතියයි

තම සමිපතම මිතුරා වු රෝහණ සිටුවරයා ගේ නිවහනේ අතුල රැකවරණය ලද වග මිත්‍ර සෙන්පතියා හෙළිදරවු කරගනියි ඔහු කලෙක පටන් රෝහණ දියණිය වු සුරූපී රෝහිණි ගේ අතපතා ඇය හා සරණ බන්ධනයේ බැඳෙන්නට සිහින මවයි

ඇය ඔහු හා විවහ ප්‍රතිඥාවකට බැඳෙයි ඒ අතුල ට හිරිහැරයක්‌ නොකරිමේ කොන්දේසියට යටත්වය 


සිය මව්තෙමෝ නමින් හැඳින්නද ළදරුවියේ පටන් ඇයගේ රැකවරණය සෙනෙහස අහිමි වු අතුල සිය පියාණන් පිළිබඳවද කිසිවක්‌ නොදනියි කරුණු එසේ වුවත් රෝහණ - රෝහිණී පිය - දියණි දෙපොළ ඒ පිළිබඳව සියඵ පවත් හොඳින් දැන සිටිති

රජරට පුරවරයේ රිටිගල ජයසේන ඇදුරාණන්ගෙන් සටන් ශීල්පය ප්‍රගුණ කර මනා නිපුණතාවයක්‌ අත්කරගත් යෝධ කායබලයෙන් අනූන  ජවසම්පන්න අතුල සෙන්පතියා යළිඳු මාගම ගාමණී - අභය සේනාංකයන් හා එක්‌වෙයි

එක්‌තරා දිනයක එහි පැවැත්වුනු යුධ සංග්‍රාමෝපක්‍රම සංදර්ශනයකට සහභාගි වු අතුල ගේ සුරුවිරුකම් දකිනු පිනිස රෝහිණිය සිය පියා කැටුව පැමිණෙයි

මේ අතර මිත්‍ර - රෝහිණි සරණ බන්ධනය ඇගේ ආයාචනයකට අනුව සයමසකට කල්යයි

මේ අතර රණගොස නංවමින් ආරක්‍ෂක බලකොටු මුලිනුපුටා දමමින් ගාමිණි අභය  - යුධසේනා විජිතපුරයට පිවිසෙයි

අනුරපුර එළාර නරපතියා විසින්ද පවත්වන්නට යෙදුනු යුධ ඇබෑසි උළෙලක්‌ නරඹනු පිනිස අතුල - සුරනිමල සෙන්පති දෙපොළ එහි පැමිණෙති මිත්‍ර විසින් සිය නරනිඳු ගාමණි අභය වෙත කරන පරභවයන් නොඉවසමින් කෝප ගත් අතුල සිය ප්‍රතිවාදියාට ද්වන්ද සටනකට ඇරයුම් කරයි

එහිදි තුවාල ලබන මිත්‍ර අතුල හමුවේ පරාජය වෙයි

පසුව රෝහණ සිටු සිය නැගණිය නාලිනී සහ දියණිය රෝහිණි සහ සෙන්පති මිත්‍ර ඇතුඵ පිරිස අතුල මුණගැසෙති
එහිදි මිත්‍ර සෙනවි පාපෝච්චාරණයක යෙදෙමින් සියලු පවත් හෙළිකරයි

කලකට ඉහතදී තමා හා සමග නාලිනී පැවැත්වු අයථා සම්බන්ධයක්‌ නිසා ඇයට උපන් දරුවෙකු පිළිබඳව කරුණු හෙළිකරයි ඔහු අන් කිසිවෙකු නොව ඔබ යෑයි තමාට දැන් දැනගන්නට ලැබුනු බව කියමින් සිය පුතු හමුවේ සමාව භජනය කරයි

හැගුම්බරව සංවේදීවන අතුල සිය මව වු නාලිනී ඉදිරිපිට පියාගේ දෙපා නමැද පෙරළා සමාව අයදියි 

පසුව සිය සේනා මෙහෙයවමින්  විජිතපුර සංග්‍රාමය ට එළඹි මිත්‍ර සෙන්පතියා රුහුණුපුර ගාමණි අභය සේනාංක විසින් ඝාතනය කරයි
                           xxxxxxxxxxxxxx


මේ අපුර්ව ඓතිහාසික සිදුවිම් දාමයේ වැඩිදුර තතු විමසන්නෙකු  ලක්‌දිව තමාට සපයාගත හැකි  සියඵ වංශකතා සහ පුරාණ ලේඛණ මුල සිට අගටත් යළිත් අග සිට මුලටත් පිටුවෙන් පිටුව පෙරළා බලනු ඇත්තේය එයින් ඔහු පුරාණ ලක්‌ ඉතිහාසයේ බොහෝ ඇසූ පිරූ තැන් ඇත්තෙකු බවට පත්වෙනු නිසැකය  එහෙත් එසේම කිසිදිනෙක ඔහුට අතුල  - රෝහිනී පෙම්පුවත හමුනෙවන බව ද නිසැකය 

සප්ත මහ සයුර බඳුවු පෙර සසර පුරුදු පුහුණු කළ මතු ද එසේම විය හැකි දැවැන්ත අසාමාන්‍ය පරිකල්පන ශක්‌තියකින් හෙබි කොග්ගල ප්‍රාඥයා විරුදාවලිය ලද මහා ගත්කරු මාර්ටින් වික්‍රමසිංහ ශූරීන් ගේ මනෝලොව මැවුනු මේ චරිත රෝහිණි නම් වු නවකථාවකට පෙළගස්‌වා දොරට වැඩියේ අදින් සියවසකට ආසන්න යුගයකදීය එනම් 1929 වසරේදීය

බ්‍රිතාන්‍ය යටත් විජිතයක්‌ වු එදා ලක්‌දිව සිසු දරුවන් සිය පළමු සිප්සත කඩඉම ලෙස මුහුණ දුන්නේ කේම්බ්‍රිජ් කණිෂ්ඨ සහතික පත්‍ර පරීක්‍ෂණයටයි  (Cambridge Junior Certificate) වාර්තාගත රසික සම්මානනයකට බඳුන් වු රෝහිණි නවකථාව බිහිව දසවසකට අසන්න වෙද්දී පාලකයන් විසින් මේ කඩයිම් විභාගය අවලංගු කරවා ඒ වෙනුවවට කණිෂ්ඨ සහතික පත්‍ර විභාගය හඳුන්වා දුන්නේ මේ අපුර්ව කෘතිය එහි නිර්දිෂ්ඨ ග්‍රන්ථයක්‌ ලෙස යොදාගත යුතු බවට නියම කරමිනි

එතැන් පටන් සුවහසක්‌ සිසු දරුවන් එය රසවිඳින්නට ඇත 

නිර්මාණකරුවෙකු මවන මහරු වනස්‌පතියක්‌ බඳුවන් නිමැයුමක්‌ එවන් තවත් නිර්මාණකරුවන් අතට පත්වුයේද එයින් තව තව නිර්මාණ බීජ හටගන්වයි ඒවා පසුව දඵ ලා වැඩී මව් නිර්මාණයද පරයා නැගි සිටින සේය

ඉහත කී මේ සිසුකැළ 50 දශකයේ යොවුන් පරපුරයි ඔවුන් අතරින් අදී නාලන්දියෙකු සිය ළමාවියේ අතීතාවලෝකනයක යෙදෙන්නට රිසිවි දෝ කොග්ගල ප්‍රාඥ විකුම්සිංහයන් නැවැන්වූ තැනින් සිය කර්තව්‍ය ඇරඹීය අතුල - රෝහිණි පෙම්වතුන් යුවළ විසින් කරන්නට යෙදුනු සුන්දර සංවාද මන්ඩපයේ විසිතුරු මෙසේ ඔහු ලියා දැක්‌විය


අතුල -

බැඳිලා ප්‍රේම බැම්මේ

නොබල කෙසේද ඉන්නේ

මම අතුල සෙනවි ප්‍රෙමේ 

කුමරි දකින්ට ආමි


රෝහිණි - 


මහ සෙනවි පුතෙකු විලා

රෝහිණී ඔබේ දමාලා

ගියදා පටන් අඞාලා

අනුරාපුරේ ගලාලා


අතුල - 


හද මාගේ බාර දීලා

ගිය දා පටන් දමාලා

ඔබේ රූපේ මා මාවලා

සිම්බා  සුදා කියලා


රෝහිණි - 


දුක දන්නේ දුක විඳින්නේ 

පෙම්වතිය මයි මේ ලෝකේ

ළත වී උසුලා උන්නේ

දැවි දැවි ඇවිලෙන ගින්නේ 


අතුල - 


ප්‍රිය දේවිය ඔබ හින්දා

නොවිඳින දහදුක්‌ වින්දා

මංගල ජයකොඩි බන්දා

ගෙනයමි වස්‌තුව කැන්දා


රෝහිණි


සිංහලයේ සතුරු සේනා

වනසන්න ඔබ හදන්නේ

අපේ ප්‍රේම සටන සාමි

කවදාද අපි දිනන්නේ


අතුල - 


ඔබ මා පතා සිටිනම්

එකසිත් අපේ තිබේනම්

ඉටුදේවයා ඔබේ දැන්

මතු ජාති ජාති වේ මම්

බැඳිලා ප්‍රේම බැම්මේ

නොබලා කෙසේද ඉන්නේ

----------------------------

සවන්යොමා රසවිඳින්න මෙතැනින්


ඒ සිසුකැළේ තවත් දරුවෙකු ඊට රසපිරි සත්සර නාදරටාවක්‌ නිමවා සිය යොවුන් මිතුරු කැල නියෝජනයක කල දෙදෙනෙකුට ඊට පණ පොවන්නට ඇරයුම් කලේය

මේ පැදිපෙළ ලියු යෞවනයා මරදානේ සැලැස්‌කි පදෙස්‌ වැසි  කරුණාරත්න අබේසේකරයන්ය සත්සර මියෑසි මිහිර මැවු රසවතා පේරගස්‌වත්ත ලියන ආරච්චිගේ සෝමපාලය හඞ මුසුකලේ මොරිස්‌ දහනායක නම් යෞවනයා සහ පුෂ්පරාණි ආරියරත්න නම් යුවතියයි

මේ නිර්මාණකරුවන් කිසිවකුත් අද මේ මිහිමත නැත එහෙත් මේ සුන්දර නිර්මාණය ඔබ අප අදත් හෙටත් මතුදාත් රසගන්වනු නිසැකය

පසු සටහන

ඇතැම්හු මේ නවකථාව විදේශිය කෘතියක ආභාෂය ලබා ඇති බව කියා සිටියහ ඉතාලි ජාතික බ්‍රිතාන්‍ය ගත් කතුවර Rafael Sabatini  ගේ ස්‌කැරමුෂ් (Scaramouche) කථා සැකිල්ල ඊට ගුරු කොට ගෙන ඇති බව ද කියා සිටියහ එය 1921 ප්‍රකාශයට පත් වුවකි රෝහිණි එළිදුටුවේ 1929 වසරේදිය

(මුලාශ්‍රය - අධිනිතිඥ ඩබ්ලිව් ඒ අබේසිංහ ලියු මාර්ටින් වික්‍රමසිංහ චරිතාපදාන කෘති පෙළ)


-----
එදා ඇසුණු ගී බ්ලොග් නිර්මාණ - 2018 ජූලි 12 දාතමිනි

Thursday, June 21, 2018

දරු නැළවිලි සිනමා දසුන් උදෙසා ගැයු ගී


සලරූ දසුනක මැවුණු දරු සෙනෙහස - සිංහල සිනමාවේ දරු නැළවිලි ගී රසදහරා - 1950-1980 - පළමුවෙනි දිගහැරුම


මින් දශක දෙක තුනකට පෙර දිවි ගමන මෙතරම් සංකීර්ණ නොවු බහු භාන්ඩික නොවු එදා සමාජයේ කාන්තාවන් රැකියා වල නිරත වුයේ නම් ඒ බොහෝ විට හෙදි හෝ ගුරු වෘත්තියේම විය සෙස්‌සෝ නිවසේ රැඳි සිටිමින් එහි කුදු මහත් වැඩ කටයුතු වල නිරත වුයේ සිය පවුල මනා ලෙස කලමනාකරණය කරමිනි

මෙවන් ගම් පියසක්‌ අතරින් පියමං කරන්නෙකු සවනත වැකි කාන්තා හඞකින් ගැයෙන ළයාන්විත ගී රාවයක්‌ වුයේ නම් එය බොහෝ විට දරු නැළවිල්ලක්‌ම විය සිය දවසේ ඉහුම් පිහුම් මෙහෙවර අතරේ ලැබුනු විරාමයෙන් සිය ළදරුවන් උකුලේ හොවා ගී ගයමින් නළවන දසුන් විරළ නොවිය

දයා කරුණා මෘදු ගුණය කැටිවූ සිය මවගේ ගී හඞින් එකි ළදරුවන් තුල සැගව නිධන්ගත ව පැවති පෙර සසර ද පුරුදු පුහුණු කල සෞන්දර්යාත්මක හැගීම් කවි සංකල්පනා මෙන්ම රස වින්දන මනෝභාවයන් කුඵ නොගැන්වි යෑයි කිව හැකිද ? එය එසේ සිදුවන බවට ඇතැම් පර්යේෂකයන් මත පළ කරනු ලැබ තිබේ

උතුරා දෙගොඩ තලා යන සදාතනික මව් සෙනෙහස කැලතී ගලා ආ ඒ ගී රසය විඳි ළදරුවන් මතු යම් දිනක මධුර මනෝහර ගී තනු නිපැයූ ලෝ පුජීත සංගීතඥයන් බවට පත් විය හැකිය කවි රස වෑහෙන ගී සීපද ලියු සාහිත්‍යධරයන් විය හැකිය යටත් පිරිසියෙන් ගි කවි සාහිත කලා රස විඳින පරිණත රසිකයන් හෝ විය හැකිය

මානව සමාජයේ සාමාජිකයන් අතර නාගරිකයන්ට වඩා වෙසෙසින් ගැමි දිවිය ඇසුරේ වැඩෙන්නන් තමා අවට පරිසරය හා සහ සම්බන්ධතා පවත්වාගනිමින් සෞන්දර්යය වින්දනය කරන්නට ඇති ඉඩ කඩ වැඩිය 

එදමෙදා තුර බිහිවු විශීෂ්ඨ ගී නිර්මාණයන්ට දායක වුවෝ බහුතරය මෙසේ සිය ළමා කාලය මනා ලෙස රිසි ලෙස වින්දනය කළ පුද්ගලයන් වු බව ඔවුන්ගේ දිවිමග පුවත් පිරික්‌සද්දී හෙළිවෙයි

ඔවුන්ද එසේ තමා ලද එකී සොඳුරු වින්දනය පෙරළා සිය කලා නිර්මාණ ඔස්‌සේ ප්‍රකාශනයට පත් කරති 

දශක 07 ක්‌ ඉක්‌මවා ගිය සිංහල සිනමා ගී වංශයේ ප්‍රථම තෙදශක අතරවාරයේ එසේ හමුවන දරු නැළවිලි ගී නිර්මාණ සමාලෝචනය කරන්නට දැරූ ප්‍රයන්තයකි මේ 

සිංහල සිනමා දරු නැලවිලි ගී සමුච්ඡයේ මුල් යුගය පිළිබඳව අවධානය යොමුකරද්දී නිතැතින්ම සඳහන් කළ යුතුම ප්‍රමුඛත්වය ලැබිය යුතු වන්නේ ඉන්දිය සම්භවයක්‌ සහිත පසුව ලාංකිකයෙකු බවට පත්වු සංගීතඥ රාමයියා මුත්තුසාමි හෙවත් මුත්තුසාමි මාස්‌ටර්ය ලාංකීය සිනමා දරු නැළවිලි ගී වංශයේ මුල්ම ගීතය ද ඇතුඵ වඩාත්ම රසාලිප්ත ගී තනු නිමැයුම් ඔහුගේ ය ඉන් අනතුරුව ගුරුදෙවි සුනිල් සාන්තයන්  පද්ම ශ්‍රී පන්ඩිත් අමරදේවයන් සහ ආචාර්ය ලයනල් අල්ගම ද ඊට සැපයු දායකත්වය සුවිශේෂීය 


ගී පද රටා වියමන් හෙළ බස්‌ වියරණ ඇදුරු අරිසෙන් අහුබුදුවන් ඒ ජේ ද සොයිසා චන්ද්‍රා වයමන් කරුණාරත්න අබේසේකර චිත්‍රානන්ද අබේසේකර සහ මහගම සේකරයන් යන මේ වියතුන්ගෙනි  

මෙහිදී රසික හදවත් පිනවූ මුල් කාලීන මුත්තුසාමි නිර්මාණයන් උදෙසා  හඞ මුසු කරන්නට අවස්‌ථාව ලද්දේ කලාශූරී ලතා වල්පොළ ටය විශාරද සුජාතා අත්තනායක සහ නන්දා මලිනී මෙහිදී ඇයට පියවරක්‌ පසු පසින් සිටිති 

ඒ අනුව මේ සටහන දිගැහැරෙන්නේ 1947 වසරේ තිරගත වු බි ඒ ඩබ්ලිව් ජයමාන්නගේ කඩුවුනු පොරොන්දුවේ සිට නොව ඉන් සත්වසකට පසු තිරයේ ඇඳුනු අහංකාර ස්‌ත්‍රි සලරුව පාදක කරගනිමිනි සිංහල සිනමාවේ පුරෝගාමී නිෂ්පාදකයා වු එස්‌ එම් නායගම් විසින්ම අර්ථපතීත්වය දැක්‌වු එහි අදියුරු ලෙස කටයුතු කරන්නට නියම වුයේ ඉන්දීය ජාතික ඒ බී රාජ් වෙතට

ලෝකය පෙරළෙයි කාලේ ගෙවී යයි -  මරුව ලගා වෙනවා'''''''''

සිතු දේ නොම වෙයි නොසිතු දෙයක්‌ වෙයි -  ලෝ දම් කැරකෙනවා''''''''

පොහොසත් දරුවා තැලේ පෙලේ  - දුකසේ දැඩි වෙන්නා පවේ බලේ''''''''

දුප්පත් දරුවා සුව යහනේ මතු සැප සේ වැඩෙනා - පිනේ බලේ''''''


දොයි දොයි දොයි - බයි බයි බයි '''''''''''

---------------
පද සංකල්පනාව - නැසිගිය හියුගෝ ප්‍රනාන්දු 

තනුව - නැසිගිය රාමයියා මුත්තුසාමි

සලරුව - අහංකාර ස්‌ත්‍රි - 1953

ගැයුම - දක්‍ෂිණ භාරතීය ගායක ඒ එම් රාජා
------------------------

මෙතැනින් සවන්දෙන්න

ලාංකිය ජන දිවිය හා එකට වෙළි බැඳි ඇති බුදු දහමේ හරය ඉස්‌මතු කොට දක්‌වන අනිත්‍යයතාවය මේ නිර්මාණයට පාදක වෙයි දක්‍ෂිණ භාරතීය සිනමා ගීතයේ නම රැන්දු ඒ එම් රාජා ඊට හඞ දායකත්වය පළකළේය සිංහල සිනමා ගීයේ පුරෝගාමි ගීත පද රචකයා වු නැසිගිය හියුගෝ ප්‍රනාන්දු එනම් මිගමුවේ හියුගෝ මාස්‌ටර් සිය ගීත පද රචනා පැසෙහි රුවා ගත් එහි සත්සර නිමාව මුත්තුසාමි සංගීතඥයාගෙනි 

ප්‍රකටව නැළවිලි ගී හඞ නගන්නේ මවක්‌ විසිනි එනමුදු මෙහිදී එය සිනමාපටයේ ජවනිකාව සහ කථා වස්‌තුව අනුව වෙනසකට බඳුන් කරන්නට ඇත

මේ 1955 වසරයි යළිත් වරක්‌ හෙළ සිනමාවේ පුරෝගාමි අර්ථපතී එස්‌ එම් නායගම් භාරදුර කටයුත්තකට අතගසා තිබිණි ඒ එවකට දක්‍ෂිණ භාරතයේ සාර්ථකව තිරගත කල  මංගම්මා සපථම් නමින් ඓතිහාසික කතා පුවතක්‌ රැගත් ද්‍රවිඩ චිත්‍රපටය ඇසුරෙන් සිංහල සිනමා පටයක්‌ නිපදවීමයි 

කඳානේ සිය ව්‍යාපාරික මුලස්‌ථානයේ අභිනවයෙන් ඉදිකෙරුණු දිවයිනේ මුල්ම සිනමා චිත්‍රාගාරය වු  සුන්දර සවුන්ඩ් හී සංගීත අධ්‍යක්‍ෂවරයා ලෙසින් කටයුතු කරන්නට තෝරාගත් ඉන්දීය ජාතික රාමයියා මුත්තුසාමි නම් සංගීතඥයා වෙත මෙකී අභියෝගය පැවරිණි


ඒ වෙනුවෙන් ස්‌වත්‍රන්ත්‍ර ගීත 11 ක්‌ නිමවා  ස්‌වාධින තනු නිර්මාණය කරන්නට තමන්ට ලැබුනු මුල්ම අවස්‌ථාවෙන් උපරිම දස්‌කම් දක්‌වන්නට 
ඔහු සමත්විය මාතලන් නමින් ආදායම් වාර්තා බිඳහෙලමින් තිරගත වුවද ද්‍රවිඩ ඌරුවෙන් නොමිදුනු  මෙම සිනමා පටය රසික හදවත් හි නිදන්ගත කලේ එහි   ඇතුළත් වු මෙකී මෝහනීය ගීත පොකුර විසිනි එහි සියඵ ගෞරව බුහුමන් මුත්තුසාමි සංගීතවේදියා සතුවිය යුතුය

ඔහු මේ ගීතයේ ස්‌ථායි කොටස සඳහා සාමාන්‍ය දරු නැලවිලි ගී කොටස පමණක්‌ යොදා තිබිම විශේෂත්වයකි

මාතලන් සිංහල පරිවර්තිත සිනමා නිර්මාණය වෙනුවෙන් ගැයුනු සියඵම ගී පබැඳුම් බෙනඩික්‌ට්‌ ප්‍රනාන්දු හෙවත් බෙනඩික්‌ට්‌ මාස්‌ටර් ගෙනි මේ යුගයේ ගීතරචනාවන්හි ප්‍රකට නොවන ප්‍රශස්‌ත බවක්‌ අර්ථපුර්ණ බවක්‌ ඔහුගේ මෙකී ගීත රචනාවන්හී අඩංගු වේ


දොයි දොයා දොයි ......

දොයිය පුතා.......

බයි බයි බයි......

බයිය පුතා.....

රමනී පින්සරා.......

මුව සිරි දිළෙන්නා........

පුබුදු කුසුම සේ.........

මුකුඵ පාන පුතා.......

හඳ මාමා ගෙනේ.......

කිරිපැණි කළතලා......

රස මිහිරේ මේ මා පුතාටා........

නාඞා මා තුරුලේ නිදා.......

ඉන්න පුතා..........

මගේ අභිලාෂේ'.........

ඉටුවේ තිරසරා......

ඔබ ගේ මාගේ ඉටු දෙවි කුමාරා......

රජ සිරි වංශයේ ......

දිවි මා බේරා......

ලෝකේ සිරිනේ බැඳේවා.....

දේවාසිරි සරණේ ලබා.....

දොයිය පුතා..........
---------------
පද සංකල්පනාව - බෙනඩික්‌ට්‌ ප්‍රනාන්දු

තනුව - නැසිගිය රාමයියා මුත්තුසාමි

සලරුව - මාතලන් - 

ගැයුම - කලාශූරී ලතා වල්පොළ
------------------------


මෙතැනින් සවන්දෙන්න
සේයා රූ උපුටාගැනීම - යසපාලිත නානායක්‌කාර ගේ මොණරතැන්න - 01 - නන්දා මාලනී ගීත ජවනිකා නිරූපනය මාලනී ෆොන්සේකා


යළිත් දිනක මෙතැන් සිට '''''''''''''''''''''''''''


Wednesday, June 6, 2018

සංගීතඥ ආර් ඒ චන්ද්‍රසේන ජීවන තතු - අංක 04

එදවස දෙසවන් නැළවු සත්සර රන්ස්‌වරය  - 04 වන දිගහැ‍ර‍ැම (1924-1980)


1960 දශකය දෙවන භාගයට එළඹී ඇත චන්ද්‍රසේන සංගීත චාරිකාව සතරවන දශකයට එළඹෙමින් තිබිණි 



----------
ආර් ඒ 
චන්ද්‍රසේන -සිය තැටි ගී රස මවලූ සරපුවර‍ැව වයමින්----------------

පිය උරුමයෙන් තමනට දායාද වූ සප්තස්‌වර රස මැවුම් ශිල්පය අපමණ දුක්‌ ගැහැට කම්කොටොඵ විඳිමින් මේ දක්‌වා ස්‌වෝත්සහයෙන් ප්‍රගුණ කරමින්  ලොව ඇතිතාක්‌ හමුවෙනතාක්‌ දැනුවත්වනතාක්‌  සංගීත ශිල්පීය ක්‍රම අනුව ගැයුණු ගී අඩංගු තැටි ශ්‍රවණය කරමින් ඒවායේ ආකෘතින් හදාරමින් යළි යළි අත්හදා බලමින් ඒවා ඇසුරේ තම අත්දැකීම් අනුව නව නිර්මාණ බිහිකරමින් මෙතුවක්‌ කාලයක්‌ තමන් ආ ගමන් මග ඔහු ආවර්ජනය කරන්නට ඇත


තවද පෙර අපර දෙදිග ප්‍රධාන ප්‍රවාහයේ සංගීත විෂයධාරා ගුරුකුල ශිල්ප රටා විස්‌තර කෙරුණු පොත්පත් නිරන්තරයෙන් පරිශීලනය කරමින් තම කාලය මුදල් හා වැය කල ශ්‍රමය අපතේ හරින්නද ?

මේ දිවයින පුරා ගී රසිකයන් අතර නව පිබිදීමක්‌ ඇතිවෙමින් පැවති යුගයයි ගුවන් විදුලිය විසින් එතෙක්‌ කරගෙන පැමිනි හින්දි ගී උන්මාදයට උඩගෙඩි දීම සිමාකරමින් නව නිර්මාණ නව වැඩසටහන් රාශියක්‌ ඔස්‌සේ නිරන්තරයෙන් එළිදකින්නට වු යුගයයි

ඊට සමගාමිව පෞද්ගලික තැටි ධාවන යන්ත්‍ර හිමි රසිකයන් වෙනුවෙන් නවතම වෙළඳ තැටි ඇල්බම් එළි දක්‌වමින් පැවතින ගීත නදියේ ඉවුරු බිඳ නැගි ආ ලතින් ඇමෙරිකානු - ස්‌පාඤ්ඥ වේග රිද්ම සුසංවාද ප්‍රසංවාද ශිල්පය මත පදනම් වූ සාමජිකයන් ගණනක්‌ එක්‌ව ගයන සමුහ වේග රිද්ම ගායක කන්ඩායම් හතු පිපෙන්නාක්‌ සේ එළිදකින්නට වූ අතර ගුවන් විදුලිය ද තම සංගීත ප්‍රතිපත්තිය මදක්‌ ලිහිල් කරමින් ඊට රැකුල් දෙමින් ඒවා සඳහා  දිනපතා තම පෙරවරු ගුවන් කාලය වෙන්කරවා දී තිබිනි
මේ සියඵ කරණා සැළකිල්ලට බඳුන් කළ චන්ද්‍රසේනයන් ශිල්පීය දිවියේ එදා මෙදා තුර නොගත් පෙරළිකාර  තීරණයකට එළඹෙමින් සිටියේය 

  දිවා රෑ නොබලා තමන් දශක ගණනක්‌ තිස්‌සේ රැස්‌කළ ධනය යොදා තමන්ගේ ම වෙළඳ තැටි ලේබලයක්‌ බිහිකරන්නටත් ඒ ඔස්‌සේ තමාගේම තනු රටා නිර්මාණ බිහිකරවා ප්‍රචලිත කරන්නටත් තීරණය කරන ලදී

ඒ අනුව ඔහුගේ නමේ මුලකුරු අනුව සකසනු ලැබ තිබූ  ආර් ඒ සී නම් නවතම තැටි ලේබලය සිංහල තැටි වංශ කථාවට එක්‌විණි

මින් වසර දෙක තුනකට පෙර තමන්ට අත්විඳින්නට සිදුවු දුක්‌ගැහැට හා අමිහිරි අත්දැකීම් ඔහු ගේ සිත නිරන්තරයෙන් පෙළන්නට වූවා විය හැකිය දස වසරක පමණ කාලයක්‌ හෙළ සිනමා ගීතයේ ප්‍රවර්ධනය උදෙසා කල කැප කිරිම් හමුවේ ලැබෙන්නට නියමිත ව සිටි සම්මානය අහිමි වීම විසින් ඔහු ගේ සිත තළාපෙළා මිරිකා දමා තිබිනි

එවකට  කොළොම්පුර කොටුව පදෙසට ආසන්නයෙනි දිවයිනේ ප්‍රමුඛතම පුවත්පත් කාර්යාල ද්විත්වය පිහිටා තිබුනේ එයින් අදද ලේක්‌හවුස්‌ ආයතනය එදා පැවති ආකාරයෙන්ම ක්‍රියාත්මක වුවද ඉන් ඔබ්බෙහි පිටකොටුවේ තරමක උස්‌බිමක පිහිටා තිබුනු දවස - රිවිරැස පුවත්පත් ආයතනය මිලිණව ගොසිනි

70 දශකයේ එළිපත්තේ එක්‌තරා දිනෙක එහි පළවුනු දවස කර්තෘ මන්ඩලය වෙත පියනැගු චන්ද්‍රසේනයන්  තම මිතුරු සමාගමයේ සාමාජිකයෙකු වු එහි ජ්‍යෙෂ්ඨ කර්තෘ සිරිල් ඒ සිලවිමලයන් මුණගැසුනි එහි යාවජීව සාමාජිකයන් අතර ගුවන් විදුලියේ ජ්‍යෙෂ්ඨ නිවේදක ප්‍රවිණ ගීත රචක කරුණාරත්න අබේසේකරයන් ද වු අතර චන්ද්‍රසේන සංගීතායතනයට නුදුරින් මරදානේ සැලැස්‌කි පෙදෙසේ සිය නිවහනේ  පැවැත්වු සංගීත සාජ්ජයන් සඳහා චන්ද්‍රසේනයන් ප්‍රමුඛ ඔහුගේ වාදක ගායක බලඇණිය නිරතුරුව කැඳවාගනු ලැබීය


කලෙක පටන් සිතේ කැකැරෙමින් තිබු වේදනාව තුනි කරගනු වස්‌ තමන් මුහුණ පෑ එකී අමිහිරි අත්දෑකීම් පෙළ ඔහු හමුවේ අපුරු කවි පද පෙළකට හරවාගත්තේ ඒවා සිය කුඵඳුල් වෙළඳ තැටි නිර්මාණ ගොන්නට එක්‌කරගනු පිනිසය

01 මෝහෙන් මුලාවෙලා - මානෙන් උදම්වෙලා - තන්හාව - ක්‍රෝධ ද්වේෂ පාරේ - මිනිසා කොහේද මේ ?.......

   රත්තරං කෙන්ඩියේ සිංහ තෙල් වගේ - මිනිස්‌ ගුණේ සැමදා බැබළේ - එය රැකීම අප උරුමේ වේ .....

   කේළම් කීමෙන් ඕපදුපයෙන් රට කොටවන වැඩ අවදානම් - උඩින් මිතුරු වි යටින් හතුරු වී.....

   උගුල් අදින්නා යයි දිය වී - බොරුවෙන් රට පිරිහේවී.....

   මා හරි උගතා  - මා හරි ජගතා - හිතනා මිනිහා මෝඩයෙකි....

   අනුන් හෙළන්නට වළක්‌ කපන්නා  - එහි තුල වැටිලා මියයන්නා....

    කළදේ පළදේ මෙළෙසේ.........

මෙතැනින් සවන්දෙන්න
-------------------------




02  ලිඳෙන් වතුර බීලා - එයින් වතුර නාළා - ළීඳට ගල් ගසාලා.....

      වතුර බොරකරයි මිනිසා - ගගට ආවඩයි.....

මෙතැනින් සවන්දෙන්න
-------------------------



තම දිවියේ ලැබෙන මහගු ඇතැම් විට එකම අවස්‌ථාව ලැබී අවසන්ව තිබියදී එය නිසිපරිදි හිමිකරගන්නට ඉඩ නොතබා එහි ඵලය භුක්‌ති විඳිම වළකා දුෂ්ඨ චේතනාවෙන් ඊර්ෂ්‍යා පරවශව එයට අකුල් හෙලා වැනසීමෙන් හටගත් සන්තාපය මේ පද පෙළින් මනාව චිත්‍රණය කර දක්‌වන අතර එය මෙලොව තවත් බොහෝ මිනිසුන්හට පොදු අත්දැකීමක්‌ නිසාවෙන්දෝ ඒවා අදද ජීවගුණයෙන් බබළයි 


තැටි නිෂ්පාදන ව්‍යාපාරයක්‌ යනු අතිශය භාරදූර කාර්යයකි  එවැන්නක නිරතවන්නට ඊට පළපුරුදු අත්දෑකිම් ඇත්තන්ගේ දායකත්වය අතවශ්‍යයය  එකල්හි දිවයිනේ එකී කාර්යයේ නිරතවන්නන් වෙත පැවති අභියෝග සුඵපටු නොවේ  වර්ණ මුද්‍රණ ශීල්පය  නොපැවති සමයේ වර්ණ වෘත්තිය ඡායාරූපකරණයේ නිරතවූවන් ද විරළ විය  විදේශිය සමාගම් හා නිරන්තරයෙන් ගණුදෙනු කරන්නට සිදුව පැවති අතර ඒ සඳහා දුරකථන සම්බන්ධා ලබාගැනීමේ පහසුකම්  භාන්ඩ හුවමාරුකරගැනීමේ පහසුකම් අවම විය


ඉහත කී බාධක අවහිරතා මැඩපවත්වාගෙන ව්‍යාපරය නිසිලෙස පවත්වාගන්නට නම් ස්‌වකීය පවුලේ වගකීම් ලිහිල් කරගනිමින් හා යුතුකම් අතපසුකරගනිමින් කටයුතු කරන්නට සිදුවීම නොවැළැක්‌විය හැකි කරුණක්‌ව පැවතුනි

එවකට දිවයිනේ ජනප්‍රියතම වෙළඳ තැටි ලේබල දෙකක්‌ වෙනුවෙන් වාදක මන්ඩලය හා ගායන ශිල්පීන් පුහුණුකරවා ශබ්දාගාර සම්බන්ධීකරණය කරමින් ඒවා පටිගතකරවා නිර්මාණය කරදීමේ දැනුම හා පළපුරුද්ද යන මේ කරුණු වලින් ඔහු මනා ලෙස සන්නද්ධය

ඉන්පෙර දශක 03 ට ත් එපිට සිට ගුවන් විදුලියේ ළමා පිටියේ සාමාජිකයෙකු ලෙස කටයුතු කළ සමයේ සිට හොඳින් දැන හැඳින සිටි අබේසේකරයන් හමුවි තවත් ගී පද රචනා කිහිපයක්‌ ලියවා ගත් චන්ද්‍රසේනයන් හට මෙවර මුහුණපාන්නට සිදුවුයේ තවත් භාරදුර අභියෝගයකටය

එනම් ඒ ගීත ගායනාකරන්නට සුදුසු ජනප්‍රිය ශිල්පීන් තෝරාගැනීමේ කටයුත්තයි එතැනින් අසමත්වීම යනු තමන් දැරූ අපමණ වෙහෙස වැයකල කාළය හා ඊටත් වඩා වැදගත් වූ ධනය මකර කටේ හෙලන්නට සිදුවීමයි

-------------------------------------------------
මතු දිනක යළි හමුවෙමු ...........................

(විශේෂ ස්තුතිය - ආචාරිනී දර්ශනී චන්ද්රසේන - ආර් ඒ චන්ද්රසේන කණිටු දියණිය)
----------------------------------------------------------------

Tuesday, May 22, 2018

ඔස්ටින් මුණසිංහ දිවි මග සළකුණු ‍ - 11 (සමාප්තිය)

යළි හමුවන තුරු ඔබට සුභ ගමන් සොඳුරු ගාන්ධර්වාණෙනි .......!



සිංහල අවුරුදු පාසල් නිවාඩුව ගෙවි යමින් තිබිනි  කලකට සන්සුන්ව සිටි සිය සිරුර යළිත් තමන්ට අරියාදු කරන්නට පටන් ගෙන ඇති බවක්‌ ඔහුට හැගී ගියේය  මෙවර එය වඩාත් උත්සන්නව වි ඇති සේය  ඊට වහා අවනතවීම ඔහුට නොරිසිය කලයුතු බාරගත් වෙනත් වැඩ කටයුතු බොහෝය 

හෙළ ගී මිහිර රස විඳින කලාකරුවන් අගයන ඔවුන් හා නිරතුරු රැඳෙන කලාකාමි රසවතා මහඇදුරු කාලෝ ෆොන්සේකා හමුවේ සිය අකීකරු සිරුර හික්‌මවාගන්නට ඔහු කලෙක පටන් පුරුදු ව සිටියේය එහෙත් මේ වාරයේ එකී සුපුරුදු රටාව හා අනුගත වන්නට ඔහු සිත ඉඩනොදෙන්නට ඇත 

මෙවර ඊට සිය හිතවත් වෙනත් වෙදැදුරෙකු ගේ සහය පැතිය ඔහුගෙන් ලැබුනේ රෝගීන්ට පොදුවේ ලැබෙන උපදෙසයි

... රෙස්‌ට්‌ කරන්න ..........ගෙදරට වෙලා ..............

එහෙත් දශක දෙදකට අධික කාලයක සිට නිතිපතා ආ ගිය සිය සුපුරුදු කෙම්බිම සිසු දරුවන් ගෙන් දුරස්‌ ව සිටිම නොඉවසූ ඔහු ගේ ගත ද සිත ට එරෙහි නොවි එහි රැඳුනේය

හෙළයා ගේ සැණකෙළි සමය වු බක්‌මාසය ලෝකයා ගෙන් සමුගෙන යන්නට දෙදිනක්‌ ඉතිරිව තිබේ 28 වන දින සැඳැ හිරු බැසයන යාමයේ ඔහුට සිය උරස්‌ කුහරය තවදුරටත් තමන්ට අවනත නොවන බවක්‌ හැගී ගියේය දයාබර පියඹ කැඳවු ඔහු සිය  ආශ්වාස ප්‍රශ්වාස කිරීමේ අපහසුතාවය දැන්වීය 

එවැනි දෑ ආගන්තුක නොවු මුණසිංහයන් එය නොතකා හරිමින් එදිනෙදා වැඩ කටයුතු වල නිරත වන්නට පටන් ගත්තද 

අවසන ඇයගේ බලවත් පෙරැත්තයට ට අවනත වන්නට සිදුවිය  


ඒ අනුව දියණිය ශ්වෙතකීට නිවසේ දෙරගුඵ ලා ගන්නට යෑයි නියම කරමින් තරුපති පුතුද කැඳවාගත් ඇය මේ සරළ මිනිසාගේ සුපුරුදු ගමන් බිමන් ගිය වාහනය වු තුන්රෝද රථයකින් ඔහුව වහා  එතරම් දුරින් නොපිහිටි ජාතික රෝහල වෙත කැඳවාගෙන ගියේය එහිදි වහා ගිලන් ඇඳක හොවන ලදුව යොමුකරවුයේ  ඊ සි ජී පරික්‍ෂණය සඳහා ය

ඔයා ඉක්‌මනට ගෙදර යන්න දුව තනියෙන් නේ ...........................


එහි වැතිරගෙන ඇය වෙතට නෙත්යොමාගත් ඔහුගේ දරු සෙනෙහස වදන් වලට පෙරළි ගලා ගියේය ....

එහි ඇඳි තිබුනේ නොතිබිය යුතු නොකිවයුතු සටහනකි රෝගියා වහා අධිසත්කාර ඒකකය වෙත යොමුකරන්නට නියම කෙරිණි

මළහිරු බැසගොස්‌ හෝරාවක්‌ දෙකක්‌ ගතවෙමින් පැවති ඒ මොහොතේ එහි පැවතියේ වෙනදා නොතිබු නිහඞතාවයකි අසාමන්‍යතාවයකි කිසිවෙකු කිසිදිනක නොපැතිය යුතු කිසිවෙකු හට මුහුණ පෑමට නොසිදුවිය යුතු තත්වයකි 

සුදු හිස්‌වැසුම් ලාගත් යුහුසුඵව ඔබ මොබ දිවයන්නියෝ කිසිවෙකුත් දක්‌නට නැත අධිසත්කාර ඒකකයේ යහන්ගතකර ඇති යළිත් මොහෙතකට හෝ මෙළොව දිවිය යදින්නන් අසල හුදකලා වෙදැදුරෙකු පමණක්‌ සිටි

රෝගියා ට ක්‌ෂණයකින් ඇවැසි ඔසු සපයා ගන්නට ඇති ඉඩකඩ අහුරා දමා ඇත්තේ  කවුරු විසින්ද ? ඔහුට මෙවාරයේ මෙළොව දිවිය හිමිකරදුන් දෛවය විසින්ද ? 

ඇයට එහිදි අසන්නට ලැබුනේ  ද අසාධ්‍ය රෝගියෙකු ගේ භාරකරුවෙකු කිසිවිටකත් සිහිනෙනුදු අසන්නට නොලැබෙන පුවතකි

එදින ඒ මොහොතේ හෙද වැඩ වැරුමක සිදුවෙමින් ඇතැයි යන්නයි ඒ.....  තිස්‌වසකට අධික කාලයක්‌  සුවහස්‌ ගණනක රසික සවන් පත් පිනවු නැළවු දස දහසක සිසු දරු දැරියන්ට සත්සර සිප්ක්‌ෂීරය පෙවූ  හෙළ ගී කලාකෙතට අස්‌වද්දන්නට සිය දහදිය ශ්‍රමය කැපකල  මේ සොඳුරු ගාන්ධර්වයාගේ ශීර්ෂ පරිලෝකන සටහන් රේඛා තිරයෙන් මැකී යමින් තිබිණි

පසුදින මෙබිමට දිනපතිඳු සැපත්වුයේ සත්සර අසිරිසර මවමින් පෙරදාද මතු මතුද අසංඛ්‍ය ගණනක මිනිස්‌ හදවත් නිවා සැනසූ - සනහාලන ඔස්‌ටින් මුණසිංහ නම්  නිසලව නිදන මේ සුන්දර මිනිසා වෙත සිය බුහුමන දක්‌වනු පිණිස වැන්න..

1997 බක්‌ මස 29 වැනි කුජ දින එසේ දිනකර නැග ආ හිමිදිරි යාමයේ ජාතික ගුවන් විදුලිය ද සිරස පෞද්ගලික නාලිකාව ද මේ සොඳුරු ගාන්ධර්වයා මනු ලොව සිය මෙහෙවර නිමවා නික්‌ම ගිය පුවත පතල කල හැරියේය 

එය කණ වැකි වහාම ආචාර්ය වික්‌ටර් රත්නායක ද රෝහන වීරසිංහ ද  ජැක්‌සන් ඇන්තනි - කුමාරි මුණසිංහ යුවළද මුණසිංහ නිවස කරා පැමිණියහ


බුදදින හිමිදිරි යාමයේ  මහනාම විදුහල  සිසු දරු කැල නිසලව නිදන සිය ආදරණිය ගුරු පියාණන් පාමුල වැටි නමැද සමුදුන් පසු එහි සිට මාලිගාවත්ත මුණසිංහ නිවස්‌න වෙත ගෙනඑන ලැබු දේහය  වෙසග මස 03 වන ශනි දින දක්‌වා එහි තැන්පත් කර තිබු අතර නන් දෙසින් හැඞු කඳුළෙන් වැළනොකැඩි  එහි පැමිණි කලා  රසිකයන් ගී රසිකයන් සිය ආදරණිය කලාකරුවා ට බුහුමන් දැක්‌වුහ

ඒ අතර එවක අධ්‍යාපන අමත්‍ය ධුරන්දර රිචඩ් පතිරණ ලංකා සම සමාජ පක්‌ෂය වෙනුවෙන් ආචාර්ය බර්නාඩ් සොයිසා තිස්‌ස විතාරණ ද හේමා ප්‍රේමදාස මැතිනිය යන මේ ප්‍රභූ පිරිස ද

සංස්‌කෘතික කටයුතු අමත්‍යංශයේ නිලදරුවන් ඔහු සාමාජිකත්ව ධුරය දැරු  නාට්‍ය හා ජන ගී අනුමන්ඩල සාමාජිකයන් රජ්‍ය සංගීත විද්‍යාලය ව පැවත පසුව සෞන්දර්ය විශ්ව විද්‍යාලයේ කාර්ය මන්ඩලිකයන් හා සිසුන් ද 

ඇතුඵ සෙසු කලාකරුවෝ ද විය

ඒ ශනිදින හිරුනැගි යාමයේ ජාතික කලාභවන වෙත ගෙනඑන ලද ඔස්‌ටින් මුණසිංහ දේහය එදින මළහිරු බැසගිය සැන්දෑ යාමයේ මහනාමයේ සිසු දරුවන් ද කලාකරුවන්ද සෙසු රසිකයන්ගේද බුහුමන් ලබමින් බොරැල්ල සුසාන භුමිය කරා ගෙන යනු ලැබිය

ඈත සිඳුතෙර දිනකර සැගවී යද්දී අග්නි - ධුම වලා පටල අතර  ඔහු රුව සැගව මිළිණව ගියද ඔස්‌ටින් මුණසිංහ නිර්මාණ සුගන්ධය එදා මෙන්ම අද ද මතුදිනද සුවහස්‌ කලාරසවතුන් සනහාලමින් නළවාලමින් ලක්‌මව සිසාර හමා යනු ඇත

ඉද්ද මල් දෙණිය වත්තෙන් ඉද්ද මල් නෙළා.......

පිච්ච මල් කඩා ගන්නෙමි මාලයක්‌ තනා....

හැන්දෑවට මං එනකොට දූට ගේනවා....

ඉන්න නාඩලා එනකං ඉන්න නාඩලා.........

සවන‍්දෙන්න 
------------



(ඔහු සත්සර හැඩගන්වාලූ රත්න ශ්‍රී විජේසිංහ ගේ පබැඳුමකි ගැයුම -  අනුලා බුලත්සිංහල) 



පරිශීලනය සහ මුලාශ්‍ර - සොඳුරු ගාන්ධර්වයා

ස්තුතියි - අචිරවතී යාලගම මුණසිංහ මහත්මිය වෙත
                  ංංංංංං    සමාප්තයි  ංංංංංංංංංං

Tuesday, May 8, 2018

ප්‍රවිණ සංගීතඥ පියදාස අතුකෝරාළ වැයුම් මැවුම් අසිරියෙන් බිදිත්තක් ....


එදා වැයු ඒ වෙණ නද ඇසේවා අදත් හෙටත් .............02 වැනි  දිගැහැර‍ැම

එසේම ලක්‌දිව් වැසි ගී රසික සහෘදයන් සොයා ඒක ද්වි පුද්ගල සජීවී වේදිකා ගී ප්‍රසංග කලා අත්දැකීම් පියඹා එන්නේ 70 දශකයේ උදාවේදීය පන්ඩිත් අමරදේවයන් ගේ ශ්‍රවණ රමණී අමරදේව නන්දා මලනී යුගල ගී ඇතුළත් වූ ශ්‍රවණ ආරාධනා මෙන්ම ශිල්පී සනත් නන්දසිරිගේ සවර්ණ කුන්ඩල හා අති දැවැන්ත මහරු ස ප්‍රසංගය සිතාර් වාදනයෙන් සරසවනු පිනිස ඔහුගේ නොමසුරු දායකත්වය ලැබිනි
















-----------------------------------


පියදාස අතුකෝරාළ ශබ්දාගාරයේ  පටිගතකිරීමකදී

සේයා‍‍‍ර‍ැව වමේ සිට

වයලීනය  - එම් කේ රොක්සාමි

බොක්ස් ගිටාරය - ‍ගායන ශීල්පී ග්‍රේෂන් ආනන්ද (රොක්සාමි ට පිටුපසින්)


තුන්වැනි වයලීන වාදකයා -ගායන ශීල්පී  මර්වින් පෙරේරා

සිතාර් වාදක - පියදාස අතුකෝරාළ
-----------------------------------------


එදවස ගුවන් විදුලිය ලාංකීය ශ්‍රාස්‌ත්‍රිය සංගීතය හදාරණ විද්‍යාර්ථින්ගේ ගේ මෙන්ම රසිකයන්ගේ ද තෝතැන්නක්‌ විය හුදු විනෝදාස්‌වාදය පිනිස නොව අධ්‍යයන කටයුතු උදෙසා ගායන-වාද්‍ය සංගීත වැඩසටහන් විකාශය කිරිමේ වැදගත්කම මෙන්ම ලාංකීය සංගීත ක්‍ෂේත්‍රයේ ප්‍රගමණය උදෙසා එසේ දායක වීම සිය වගකීම බව වටහගත් වෘත්තියවේදීන් එහි මුලසුන් අරා සිටියහ 

එවැනි වැඩසටහන් එක්‌තැන් කරමින් නිකුත් වූ සංගීතාංජලී කැසට්‌ පටයේ නැගෙන්නේ ද පියදාස අතුකෝරාළ සිතාර් වාදන රසමිහිරයි 

එමතුදු නොව හෙළයේ මහා නිළි - ගායිකා රැජිනිය වු රුක්‌මණි දේවියගේ නමින් එළිදුටු වැයූ ගී රාවයේ රාව නිම්නාදයන්ද ඔහුගේය

ගුවන් විදුලි වාද්‍ය වෘන්දයේ රසරාව නැංවු ගාන්ධර්වයන් රැස අතරින් වැඩිමනත් පිරිසක්‌ සිය ශීල්පීය ප්‍රවිණතාවයේ හිනිපෙත්තට පිවිස සුමධුර මෝහනීය තනු නිර්මාණ සහ සංගිත නාදරටා මැවූහ එහි නිමැයුනු නෙකාකාර සංගීත වැඩසටහන් සඳහා ඒවා මුසු කළහ

හෙළ සලරූ වංශයේ අතුකෝරාළ නාමය සටහන් නොවන්නේ නොවේ  එදාමෙදා තුර එහි බිහිවු අති විශිෂ්ඨ නිර්මාණ පසුබිමේ ඔහුගේ සිතාරයේ සියුම් තත් හැඞවෙනායුර ගෙනහැර පාන්නට

එදා ගුවන් විදුලි වාද්‍ය වෘන්දයේ නියමුවා වු මහා සංගීතඥ සෝමදාස ඇල්විටිගලයන් ගේ මෝහණිය සංධවනිය ක්‌ ම වු  සත් සමුදුර (1967) සළරුව වෙනුවෙන් පන්ඩිත් අමරදේව ගැයු සේකරයන් ලියූ


සිනිඳු සුදු මුතු තලාවේ

 හා

පිපුණු කුසුම පරවුනා 


සේම

ආචාර්ය ලෙස්‌ටර් ජේම්ස්‌ පිරිස්‌ ගේ ගොඵ හදවත සිනමා රූ ගොණුවේ පසුබිම් සංගීත ඛන්ඩ මෙන්ම තිස්‌ස ලියනසුරිය ගේ සාරවිට වාද්‍ය ඛන්ඩ 

ධර්ම ශ්‍රී කල්දේරා ගේ රෑණ ගිරවු වාද්‍ය මිහිර 

පමණක්‌ නොසෑහේ ඊට දක්‍ෂිණ භාරතීය කර්ණාටක ගී ආරේ විශේෂඥ සංගීතඥ නැසිගිය රාමයියා මුත්තුසාමි ගේ සත්සර පෙළගැස්‌ම පණපෙවූ  පහත සටහන් කෙරෙන ගී මුතුමිණ ද එක්‌විය යුතුමය මෙහි හෙළයේ එදාමෙදා තුර පහළ වු එකම මහා නිළි රැජින - ගායිකාව වු රුක්‌මණි දේවියගේ හඞ පසුබිමින් රැව් පිළිරැව් දෙන්නේ පියදාස අතුකෝරාළ පරම රමණිය සිතාර් නාදරටාවන්ය පද රටා කරුණාරත්න අබේසේකරයන්ගේය එය එසේ වැයෙන්නේ ගැයෙන්නේ  අදියුරු එස්‌ රාමනාදන් ගේ සම්පත (1966) රිදීතිර දසුන් කථාංගය රසවත් කරනු පිණිසය

සිතාරේ ............. සිතාරේ......

සිතාරේ ...සිතාරේ ....සිතාරේ .....

අතැගිලි පිරිමදින හඞට වයන සිතාරේ - නගන සිතාරේ.....

සිතාරේ ...සිතාරේ ....සිතාරේ ..............

---------------------
සළරුව - සම්පත

මහජන ප්‍රදර්ශනය 1966 සැප්තැම්බර් 11

පද සංකල්පනාව - නැසිගිය කරුණාරත්න අබේසේකර

තනු නිර්මාණය - නැසිගිය ප්‍රවිණ සංගීතඥ රාමයියා මුත්තුසාමි

ගායනය - නැසිගිය - ප්‍රවිණ ශිල්පිණි රුක්‌මණී දේවි
---------------------------------------------

මෙතැනින් රසවිඳින්න


පන්ඩිත් අමරදේව - ආචාර්ය කේමදාස - ෂෙල්ටන් ප්‍රේමරත්න - සරත් දසනායක - සිසිර සේනාරත්න - එම් කේ රොක්‌සාමි  - රමයියා මුත්තුසාමි - මෙල්රෝයි ධර්මරත්න - ක්‌ලැරන්ස්‌ විජේවර්ධන ප්‍රමුඛව එදමෙදාතුර හෙළ ගී කලාවේ උත්කර්ෂනය වෙනුවෙන්  උරදුන් සියඵ සංගීතවේදීන් මේ අපුර්ව සිතාර් වාදකයා සොයා ආවේ සිය නිර්මාණයන්හි ඔහුගේ වැයුම් රටා ඇතුළත් කරනු රිසියෙනි 


අතුකෝරාළයන්ගේද  ඉහත කී  සියඵ වැයුම් නද පරයා ඉස්‌මතු වන්නේ ඔහුගේ අමරණීය ගී තනු සමුච්ඡයයි ඒ තතු විමසා බලනු පිනිස  1967 වසර තරම් ඈත යුගයකට පිය නැගිය යුතු වේ 

නවරජය කිරුඵ පැළඳ ගතවී ඇත්තේ දෙවසරකි එහි ආර්ථික ප්‍රතිපත්ති ප්‍රවර්ධක සංගීතමය විචිත්‍රාංග සහ වැඩසටහන් දියත් කිරීමේ මුලීක වගකීම පැවරී ඇත්තේ දිවයිනේ එකම විද්යුත් මාධ්‍යය වු ජාතික ගුවන් විදුලිය වෙතයි

ඒ වෙනුවෙන් කළඑළි බට වැඩසටහන් අතර සුවිශේෂී සංගීතමය රසකලස නම් කෙරුණේ එඩීතර ලංකා ලෙසිනි  සංස්‌ථාවක්‌ ලෙස අබිසෙස්‌ ගැන්වූ අභිනව ගුවන් විදුලියේ මුල්‍ය ප්‍රතිපත්ති වඩාත් නම්‍යශීලිය සිය වැඩසටහන් හි ගුණාත්මක බව රැකගනු සඳහා නිෂ්පාදකවරුන්ට බාහිර ශීල්පීන් ගේ දායකත්වය රිසි සේ ලබාගැනීමේ  වරය හිමිය  

වඩාත් ප්‍රශස්‌ත ගී පද රචනා ද ගී රසගැන්වීමේ බාහිර වාද්‍ය ශිල්පීන්ද කැඳවිනි මේ අතරට අතුකෝරාළයන්ගේ මනෝහර නාදරටා හා අත්වැල් බැඳගත්තේ ඔහුගේම රමණීය තනු නිර්මාණ පෙළකි ඒ ප්‍රවිණ පුවත්පත් කලාවේදී කිවිවර තලංගම ප්‍රේමදාස ගේ පද ගෙතුම් වෙනුවෙනි


න් විමනේ දොර ඇරිලා - රන් වරුසා බිම හැලිලා.....

රන් ගොයමේ කිරි වැදිලා - සොම්නස්‌ ගග ගලනවා.....

ජීවන සරු පස මැද්දෙන් - සොම්නස්‌ ගග ගලනවා...........

---------------------------
නිෂ්පාදනය - ශ්‍රි ලංකා ගුවන් විදුලි සංස්‌ථාව - වෙළඳ සේවය

වැඩසටහන - එඩිතර ලංකා - 1967

පද - නැසිගිය තලංගම ප්‍රේමදාස

තනු රටා සහ වද්‍ය සංගීත මුසුව - පියදාස අතුකෝරාළ

ගායනය - රෝහිත විජේසූරිය - ලාලනී සෝමසිරි - අතුල සෝමසිරි  ඇතුඵ පිරිස ?
-----------------------

මෙතැනින් රසවිඳින්න



ඒ වැඩසටහනේ ඒ ළය ඇසුරේ අතුකෝරාළයන්ගේ සත්සර විචිත්‍රත්වය යළිදු මතුවෙන්නේ මෙයාකාරයෙනි



හේළී හෙළ හැගුම් රැගනිවු  - හේළි හෙළ බසින් සුරැකෙව්.....

හේළී හෙළ බසින් සැරසෙවු - හේළී හෙළ බිමේ හෙළ බිමේ....

සර ලක්‌ පොළෝ අගලක්‌ - නෑර සත් ඵලින් ඵලවත්.....

නීල කෙත් වතින් පවසවු - හේළි හෙළ බිමේ......


---------------------------
නිෂ්පාදනය - ශ්‍රි ලංකා ගුවන් විදුලි සංස්‌ථාව - වෙළඳ සේවය

වැඩසටහන - එඩිතර ලංකා - 1967 ?

පද - නැසිගිය අරිසෙන් අහුබුදු ශූරීන්

තනු රටා සහ වද්‍ය සංගීත මුසුව - පියදාස අතුකෝරාළ

ගායනය - රෝහිත විජේසූරිය - ලාලනී සෝමසිරි - අතුල සෝමසිරි  ඇතුඵ පිරිස ?
-----------------------

මෙයින් සවන පිනවා ගන්න  මෙතැන ක්ලික් කර පිවිසෙන්න

-----------------------

යළිදු වරෙක පසු දිනක තලංගම පෙම්දස්‌ පන්හිඳෙන් ගලා ආ  දේශවාත්සළ්‍යය -  අබිමන -  ගර්වය පොබයන මෙවදන් පෙළ වෙනුවෙන් ඔහු මුසුකළ මියෑසි රටාවට වසග නොවන්නෝ කවරහුද ?



රත්නදීප රත්නදීප ලංකා දීප සෝබනී - .......

රත්නදීප රත්නදීප ලංකා දීප සෝබනී - ........

ස්‌වර්ණ දීප රත්නදීප  - ස්‌වර්ණ දීප රත්නදීප .......

ලංකා දීප රාජනී  - ලංකා දීප රාජනී  ..............

---------------------------
නිෂ්පාදනය - ශ්‍රි ලංකා ගුවන් විදුලි සංස්‌ථාව - වෙළඳ සේවය

වැඩසටහන - එඩිතර ලංකා - 1967

පද - නැසිගිය තලංගම ප්‍රේමදාස

තනු රටා සහ වද්‍ය සංගීත මුසුව - පියදාස අතුකෝරාළ

ගායනය - රෝහිත විජේසූරිය - ලාලනී සෝමසිරි - අතුල සෝමසිරි  ඇතුඵ පිරිස ?
-----------------------

අසන්න මේ සුන්දර නිර්මාණය මෙතැනට පිවිස


මේ සියඵ තනු එකම ළයමානයකින් සුසැදී බව පෙනීයයි එය සුවිශේෂීය එපමණක්‌ද ඒවා ඒ යුගයේ යොවුනන් අතර දසත පතලව උන්මාදයක්‌ බවට පත්ව තිබු බටහිර කැලිප්සෝ කන්ඩායම් ගී රසය මතුකරයි එනමුදු පෙරදිග සංගීත සම්ප්‍රදායෙන් බැහැර නොයයි මෙකි කරුණු නිසාද මේ ගී පෙළේ අනන්‍යතාවය සුරැකෙයි මතුවෙයි ප්‍රකට වෙයි

මේ නිර්මාණ බිහිවන යුගයේ යොවුන් වියේ පෑළ දොර පියමං කරමින් සිටි අප සංගීතවේදියා සිය ඇසුරේ වද්‍ය තත් සිප් සත හැදෑරූ සිය ප්‍රියතම සිසුවිය වෙත  ජීවන තත්පෙළ නංවනු පිනිස ඇරයුම් කලේය ඇය කමලා නවගමුව මෙනෙවියයි 

තිස්‌වසක ගුවන් විදුලි වැයුම් දිවියෙන් සමුගෙන යනු පිනිස වරම් ලැබ 1989 වසින් එයින් බැහැර ව ගිය පසුවද ඊට ඔහුගේ අනුපමේය මෙහෙය යළි යළීත් ඇවැසි විය

හෙළ ගී කෙත සාර අස්‌වනු ගෙන දුන් පියදාස අතුකෝරාළ සංගීතවේදියා  1995 වසරේ දි කලාභුෂණ හා 2000 වසරින් රජ්‍ය සංගීත බුහුමුන් පුදා බැති උපහාර ලද්දේය  


හදේ පිපෙන බැතිමල් ගෙන - .......
සෙනේහයේ පිණිදිය ඉස.......

ඔබේ මුදුදෙපා අබියස ......................

තබා පුදන්නම් තබා පුදන්නම්..............

(එඩිතර ලංකා ගුවන් විදුලි ගී - 1967 පබැඳුම නැසිගිය තලංගම ප්‍රේමදාස)
------------------------
සවනට ගී රසය මෙතැනින්


චිරං ජයතු සොඳුරු ගාන්ධාර්යාණෙනි ඔබ හට .................!

ස්‌තුති පුර්වක ප්‍රණාමය -

මුලාශ්‍ර සහ කරුණු උපුටනය වෙනුවෙන් විශේෂ අවසරය දුන් විජිත් කුමාර් සේනාරත්න මහතා වෙත

ජයාරූපය උපුටනය - ඉන්ද්‍රාණී රොක්‌සාමි මහත්මිය වෙත

 ළකිඳු පීරිස්‌ මහතා වෙත

Tuesday, April 24, 2018

ඔස්‌ටින් මුණසිංහ නිර්මාණ මියැසි රස - 10 අංකය


හෙළ මියැසි අඹරේ හෙට පායන තරු වෙනුවෙන් ...............

ඔස්‌ටින් මුණසිංහ නිර්මාණ මියැසි රස ගුලාවේ දසවැනි දිගැහැරුම


මේ වාරයේ මනු ලොව කරා පිවිසි මේ ගාන්ධර්වයා හට සිය ඉරණම විසින් තමන්ට නියම කර ඇති වැඩ කොටස බොහෝ දුරට සමපුර්ණ කරනු ලැබු බවට හැගී යන්නට ඇත එහෙත් එයින්ම නියම කෙරී ඇති පරිද්දෙන්දෝ සිය රෝගී තත්වය විසින් සිරුරේ සවිබල ශක්‌තිය පැහැර ගෙන ගොස්‌ ඇති සෙයක්‌ ද හැගී ගියේය


මාලිගාවත්තේ සිය නිවස්‌නේ සිට තුන්රෝදරථයෙන් කොල්ලුපිටියේ මහනාමය වෙත පා නැගු ඔහු වෙත පිම්මේ දිව ආ සිසු දරුවන් සිය දයාබර ගුරුපියාණන් ගේ අත් වලින් අල්ලා වාරුකරගෙන පංති කාමරය වෙත කැඳවාගෙන ගියේය ඔහුගේ කය වෙහෙසවාලන්නට ඉඩ නොතබමින් අවශ්‍ය සියඵ සටහන් හා වාර්තා පොත් පංති කාමරය වෙත සපයා දෙන්නට විදුහල්පතිතුමා විසින් පියවර ගැණනි

ලාංකීය සංගීත - නාට්‍ය - සිනමා  කලා ක්‍ෂේත්‍රයේ නිරතවෙමින් සිය දස්‌කම් පෑ කලා ශීල්පීන් අති බහුතරයක්‌  දිවමන්ව සිටියදී අත්කර නොගත් ඔවුනට හිමි නොවු එහෙත් ලැබිය යුතුම වු දෙයක්‌ ලබන්නට තරම් ඔහු භාග්‍යවන්ත විය ඒ ඔහු ගේ සහෘදයන් කලණ මිතුරන් රැසක්‌ එක්‌ ව ඔහු කළ කි දෑ අගය කරමින් සංවිධානය කළ උපහාර උත්සවයක්‌ අසිරිය දකින්නටය  

සිනමාවේදී තිස්‌ස අබේසේකරයන් මුල් ව හපුආරච්චි වෛද්‍යසේකර කරුණාදාස ලොකුබාලසූරිය යන සහෘද රසවතුන් එහි පෙරමුණ ගත්හ 
එකී චාම් උළෙල වර්ණවත් කරමින් එදා මෙදා තුර ඔස්‌ටින් නිර්මාණ තෝරාගත් සංඛ්‍යාවක්‌ රසවත් කළෝ අතර විශාරද නන්දා මාලනී ඉන්දීවරී ආරියසිංහ සේනානායක වෙහෙරලියද්ද සහ අනුලා බුලත්සිංහල ද විය

පද්ම ශ්‍රී පන්ඩිත් අමරදේවයන් ප්‍රමුඛ ව මහඇදුරු කාලෝ ෆොන්සේකා  ආචාර්ය ප්‍රනීත් අබේසුන්දර සුනිල් සරත් පෙරේරා ලුෂන් බුලත්සිංහල ඇතුඵ පිරිසක්‌ ඔහු නිර්මාණ පසසා අගයා දෙසුම් පැවැත්වුහ

මෙකල්හි සිංහල ගී අඹරට පෑවු අධුනික යොවුන් නව ගී තාරකාවිය වු නිරෝෂා විරාජිනී මුණසිංහයන් වෙතින් සත්සර ශිල්ප ලබමින් සිටියාය දිනෙක ඇයගෙන් මුණසිංහයන් වෙත ආයාචනයකි එනම් තමා වෙනුවෙන් ගීතයක්‌ නිමවා දෙන්නටය ඒ අනුව රත්න ශ්‍රී විජේසිංහයන් ඉන්දීවරී ආරියසිංහ ශිල්පීනිය  වෙත ලබාදී තිබු එතාක්‌ භාවිතයට නොගත් පදමාලාවක්‌ ඔහු ගේ මැදිහත්වීමෙන් ඇය ට හිමිකරදී ඊට මුසුකල නාද සිත්තමයි මේ

පුන්සඳ රෑට ඇවිදින් හේනේ කඵව බිඳ .......

රන්කෙඳී සේම රන්වන් ඉරිගූ ඉඹිනවද......

තුන්යම හීන දැක දැක මොටදැයි ගෙදර ඉඳ......

රන්කඳ තාම පැල් රකිනවදෝ නිදි නැතිව ........

-----------------------------
මෙතැනින් සවන්දෙන්න



1997 වසර ට පියමං කල ලක්‌බොදු සිහල දන වෙනුවෙන් සිය ජාතික වගකීම ඉටුකරන්නට සැදී පැහැදී සිටින සැළලිහිණි තෙලදසුන් සේවය සිංහල අඵත් උළෙල සමරන්නට සුදානම් විය එහි බලධාරීන් විසින් ඒ වෙනුවෙන් පෙළගස්‌වා තිබු වැඩසටහන් අතර මියුරු සර වසන්තය ද විය එයින් පසළොස්‌ වසකට පෙරාතුව  එහි ආරම්භයේ රූපවාහිනි අධ්‍යාපන සේවය සරු කල ඔස්‌ටින් මුණසිංහයන් හට මෙවරද එහි නාද ගෙත්තම වෙත පවරනු ලැබීය 


රත්න ශ්‍රී විජේසිංහයන් ගේ වදන් ගෙත්තම් කල මියුරු සර වසන්තයේ ආකෘතිය 19 සියවසේ පරසිඳු ගජමන් පුවතේ චරිත ඇසුරෙන් නිර්මාණය කරන ලද්දේ උපාලි ආරියසිරිය 

බෙරහඞ නාට්‍යයේදී මුණසිංහයන් ගේ නිර්මාණ සැරසු ශිල්පී ජැක්‌සන් ඇන්තනි කුමාරි මුණසිංහ යුවළට අමතරව රොඩ්නි වර්ණකුල සහ සේනානායක වෙහෙරලියද්ද  මෙන්ම ජ්‍යෙෂ්ඨ ජනගී පර්යේෂක නාට්‍යශිල්පී රෝහන බැද්දගේ ද ප්‍රදිපා ධර්මදාස ද එහි සෙසු සාමාජිකයන් වුහ

එහි රොඩ්නි වර්ණකුල ගේ ගී හඞ අවදිවුයේ මෙලෙසිනි

මල්මද බිසෝ ඉතිං......
ඩිංගක්‌ හිනාවෙයන්......

අරගෙන රිදී කලේ .....

රිදී වතුර ගෙදර යමං .........

-----------------------------
මෙතැනින් සවන්දෙන්න



ංංංංංංංංංංංංංංංංංංංංංංංංංංංංං


නැවතත් එතැන් සිට මතු දිනක ................

පරිශීලනය සහ මුලාශ්‍ර - සොඳුරු ගාන්ධර්වයා

ස්තුතියි - අචිරවතී යාලගම මුණසිංහ මහත්මිය වෙත