namal67@gmail.com

namal67@gmail.com
සටහන් පෙළගැස්ම‍ Prabath Rajasooriya

Tuesday, September 5, 2017

ඔස්‌ටින් මුණසිංහ නිර්මාණ සත්සර රස ගුලාව ................. 01

ඈත ලොවක සිට හිනැහෙන හඞින් සුවය වේවා ................ 01 කොටස


ලක්‌දිව බටහිර සයුරු තෙර අද්දර කොළොම්තොටින්  දකුණු ලක දක්‌වා දිවෙන පුරවර තීරුව සරසවිදේවි වරම් ලද බොහෝ කලාශිල්පීන් ගේ ජාත භූමි ද ජය භුමි ද විය 

එයින් පළමුව ද වෙසෙසින්ද සඳහන් කළ යුතු පුරය මොරටුවය මක්‌ නිසාද යත් පසුගිය සියවසේ දශක ගණනක්‌ පුරාවට රසික සිත් සතන් මන්මත් කළ හෙළ ගී අඹර පෑයු තරුකැට බඳුවන් ගායන ශිල්පීන් වාදකයන් ගාන්ධර්වයන් රැසක ගේ ජන්ම භුමිය එය බැවිනි


ඔවුහු එහි ඉපිද හැදී වැඩී ගී නිමැයුම්  කලාවේ  විවිධ ආරයන් ප්‍රගුණ කරමින් ඒ ඔස්‌සේ සුරුවන්ව තමන්ට ආවේනික ශෛලීන් ඔස්‌සේ දිවයින පුරා ගී රසිකයන් එදා මෙන්ම අදද පිනවමින් සිටිති

හෙළයේ මහා ගාන්ධර්වයා ලෙස විරුදාවලිය ලත් පද්ම ශ්‍රී පන්ඩිත් අමරදේවයන් පෙරටුකොටගෙන  ඉන් තරමක වෙනස්‌ මගක ගිය ක්‍රිස්‌ටෝපර් ටියුඩර් ප්‍රනාන්දු හෙවත් සී ටී ද ඔහුගේ අඩිපාරේ පොප් ශෛලිය අනුගමනය කල නිහාල් නෙල්සන් සහ බයිලා චක්‍රවර්ති යන නම් ලද මහගමගේ සැම්සන් ප්‍රනාන්දු හෙවත් එම් එස්‌  පෝල් ප්‍රනාන්දු සමන් ද සිල්වා  මොරිස්‌ ජෝසප් ද සිල්වා හෙවත් ෆේ‍රඩී සිල්වා සුප්‍රකට නමුත් මතභේදකාරි ගීත කලාවක නිරත වු පංච පෙරේරා සහෝදරයන් වු සුනිල්  - නිමල් - පියල් - ලාල් ඇතූඵ පිරිස ඒ අතරින් කිහිප දෙනෙකි

ඒ අතරින් එකී මොරටු පුර ජන්මය ලදින් සිය හඞ අවදිකිරිම අවමව සිදුකරනු ලැබුවත් සෙසු ශිල්පීන් වෙනුවෙන් සිය මනසේ මැවි නැගී ආ සුමියුරු සත්සර නාදරටා මුසුකරමින් හෙළ ගී කෙත අස්‌වැද්දූ සුවිශේෂි චරිතයක සිංහාවලෝකනයයි මේ

සිය ජන්මයෙන් ලද සත්සර සිප්සර වාසනා ගුණය නිසි මග මෙහෙයවා නිසි සුයාමයේ නිසි සුරු ගුරු ඇසුරින් ඒ වසනා ගුණය ඔප මට්‌ටම් කරගනු ලැබූ ඔහු පසුව වාදකයෙකු ගායකයෙකු තනු රටා නිර්මාපකයෙකු සංගීත සංයෝජකයෙකු මෙන්ම ශිල්ප ලැදි දහසක්‌ සිසුණැන පැදූ ගුරු පියෙකු ද වූ ප්‍රවිණ ජ්‍යෙෂ්ඨ සංගීතඥ ඔස්‌ටින් මුණසිංහය

මෙතැන් සිට මදින් මද දිගැහෙරෙන්නේ ඔහුගේ සසරචාරිකාවේ මේ නවාතැනේ පුරා සපනස්‌ වසක දිවි මග රස තතු විත්ති පෙළකි

මොරටුවේ කටුබැද්දේ වැසියෙකු ව සිටි මුණසිංහ ආරච්චි ලේකම්ලාගේ තෝමිස්‌ මුණසිංහ පින්තාරු කොන්ත්‍රාත්කරු ලෙස සිය ජිවිකාව පවත්වාගෙන ගියේය ඔහු ගේ භාර්යාව කොරොට්‌ටගේ දෝන කර්ලැයින් ය අප කථානායක ඔස්‌ටින් මේ පවුලේ පස්‌වැන්නා ලෙස මෙලොවට පිවිසියේ 1941 වසරේ බිනර මස 04 දිනදීය

ඔහුද ඇතුඵව මේ දෙමහල්ලන්ට පුතුන් ලෙස සෝමදාස ගුණදාස වින්සන්ට්‌ ද දියණිවරුන් ලෙස ලිලි මාග්‍රට්‌ (ඔස්‌ටින් ගේ වැඩිමහඵ සොයුරිය) සහ රංජනී සහ සුසිලා (බාල සොයුරියන්) ද දරුවන් සත් දෙනෙකි

අදින් දශක 07 ට ඔබ්බෙන් නාගරිකරණයට පාත්‍ර නොවු මේ ග්‍රාමයේ විසු සෙස්‌සන් මෙන්ම මුණසිංහ පවුලේ සාමාජික සාමාජිකාවන් ද අල්පේච්ඡ සරළ දිවියකට හිමිකම් කීහ

සිය  නිවස ට නුදුරින් පිහිටි තෙළවල කණිෂ්ඨ විදුහලෙන් මූලික සිප්සත හැදැරූ ඔහුගේ දෙවැනි පාසල් මාතාව වුයේ මොරටුව කටුබැද්දේ බෝධිරාජ විදුහලයි

කුඩා සිසුවකු වූ  ඔස්‌ටින් ඇතැම් විට පෙර සසර පුරුද්ද පණගසා නැගී විත් දෝ තෙළවල පාසලේ ගුරුවරයෙකු ගේ වයලින් වාදනයන් වෙත දැඩි සේ ආකර්ෂණය විම ඔහුගේ මෙවාරයේ සංගීත චාරිකාවේ මුලාරම්භය සනිටුහන් කලේය නිතිපතා අපර භාගයේ පාසලේ වගා කටයුතු උදෙසා කැඳවු සිසුකැල අතරින් හුදකලා වු ඔහු ගේ එකම හා පරම සතුට ද වුයේ එකී පුරුද්දයි

ගොම්මන් අඳුර වැටිගෙන එද්දී පවුලේ සෙසු සාමාජිකයන් හා එක්‌ව බුදු පහන දැල්වීමේ කටයුත්තට සහභාගි වු ඔහු සෙසු අයගෙන් කැපී පෙනෙන ලෙස ඉතා ළයාන්විතව ගාථා පාඨ ගයන්නට පුරුදුව සිටියේය 

මුණසිංහ නිවසට තරමක්‌ දුරින් පිහිටි පුරාණ සත්පත්තිනි දෙවොලේ තේවාව වෙනුවෙන් වැයෙන භේරි නාදය ඔස්‌සේ එහි දිවගොස්‌ හිටිපියවර සිට ඊට සමවැද සිටියේ තමා සොයන්නට නිවසින් එනතුරුය

සිය පියා සදාදුන් බෙරය වාදනය කරමින් ඒවා අනුකරණය කරන්නට පටන් ගත්තේය


නිවස ඉදිරිපිට අතු පතර විහිදා නැගි සිටි ලාවුඵ ගසට නැග එහි අතුපතර රැඳෙමින් හඞනගා ගැයුවේ අවට හාත්පස ඇසෙන පරිදිය

තවත් කලෙක වෙල් ඉපනැල්ලට පිම්මේ දිවගොස්‌ ගොම්මන් අඳුර වැටෙන තුරු  තමා විසින්ම සදාගත් වස්‌දඞුව ට මුවතබා මියුරු නාදරටා මවන්නට විය 

මෙසේ සිය ළමාවිය ගතකල කුඩා ඔස්‌ටින් පවුලේ සෙස්‌සන් අබිභවා සිය දෙමව්පියන් හට  වෙසෙසින් මවට දැඩි ලෙස කිකරු දරුවකු වු අතර මව විසින් කියන තමා අකමැති යමක වුව නිහඞව නිරත වුයේ ඇයගේ සිත රිදවනු නොහැකි වීම නිසයි

ජ්‍යෙෂ්ඨය සමත්වීමෙන් සිය පාසල් දිවියට සමුදුන් ඔහු ට නිවැසියන් ගේ තීරණයට හිසනමා සිය දෙටු සොයුරාගේ ලී බඩු ව්‍යාපාරයේ සහයකයෙකු ලෙස කටයුතු කරන්නට සිදුවි තිබිණි 

තමාට දෛවය විසින් නියම කෙරි ඇති කටයුත්තෙන් බැහැර යන්නට සිදුවිම නිසාදෝ ඇවැටිලි - පැමිණිළි මාලාවකින් පසු එයින් නිදහස ලැබු ඔහු ට තම අනාගත ඉරණම් මාවතේ දොරටු විවර වන ලකුණු පහළ වෙමින් පැවතිණි

ඒ සිය දෙටු සොයුරිය විසින් ඉල්ලුම් කරන්නට යෙදුනු මැහුම් පාඨමාලාවකට නියමිත අයදුම් පත්‍රයක්‌ ඇස ගැටිමෙනි එය මෙහෙයවන්නේ කොළඹ 07 හේවුඩ් නම් ආයතනයකින් බවත් සංගීතය හැදැරිම සඳහාද අවස්‌ථාව ලැබෙන බවත් සඳහන් වී තිබෙනු දුටු ඔස්‌ටින් එය තමාට දෙන ලෙස අයෑද සිටියේය

අදාළ ලියාපදංචි කටයුත්ත සම්පුර්ණ වීමෙන් පසු නොමිලේ පැවැත්වෙන මෙකී පාඨමාලාවේ ගායනය හා වාදනය හැදැරිය හැකි බවත්  කාලසටහන අනුව දේශන පස්‌වරු 2 00 ට ඇරඹෙන බවත් දැනගත් පසු මාසික වාර ප්‍රවේශ පත්‍රයකින් මොරටුවේ සිට බම්බලපිටිය දක්‌වා සිය ගමන් පහසුකම් සලසා ගන්නට ඉටාගත්තේ නිවැසියන්ගේ එකගතාවය මතය ඒ 1960 දශකයේ මුල් යුගයයි

බයිසිකලයෙන්  තමන්ට ආසන්නතම අගුළාන දුම්රිය නැවතුමට යන අප කථා නායකයා හට කඵතර සිට පැමිණෙන දුම්රිය හමුවෙයි එහි ගමන් ගන්නා සගයන් අතර කලායතනයේ සිසුවකු නොවු ප්‍රේමසිරි කේමදාස ද ඇතුඵ ස්‌ටැන්ලි එම් ප්‍රනාන්දු ජස්‌ටින් ගාල්ලගේ යන මේ මිතුරු කැළද හමුවෙයි 

වාදන විෂය උදෙසා තමා ළමා කාලයේ ප්‍රියකල වයලීනය තෝරාගෙන සිටියද ඒ වාද්‍ය භාන්ඩය පුහුණු කළ ගුරුවරයෙකුගෙන් ලැබුනු දරුණු දෝශාරෝපනයකට ළක්‌ වී සිත් තැවුලට පත් හෙතම එය අත්හැරදමා තබ්ලාව තෝරාගන්නා ලඳී ඒ සිය විදුහල්පතීතුමා වු ලයනල් එදිරිසිංහ ශූරීන් ගේ අවසරය හා අනුදැනුම මතය

ඒ අනුව ඔස්‌ටින් මුණසිංහ නම් අනාගත ගාන්ධර්වයාගේ තරුණ සිසුවා ගේ දිවිමග චාරිකාවේ මුල්ම පහන්සිඵව දැල්වුයේ රජයේ සංගීත විදුහලේ එවක තබ්ලා වාදන උපදේශක ඇඳුරිදු පී වී නන්දසිරි ශුරීන් විසිනි

අතමිට සරු සිසු දරුවෝ සිය උපදේශකයන් ගේ අමතර පංති සඳහා සහභාගීවෙද්දී ලද දෙයන් සංතෘප්තියට පත්වන්නට හුරුව සිටි සරළ යෞවනයෙකු වු හෙතම  ඒ වෙනුවෙන් නිවැසියන් මත යෑපෙන්නට කැමැති නොවිය

ඊට අපුරු විකල්පයක්‌ තමා විසින්ම සොයගත් ඔහු සිය පුහුණුවිම් සඳහා  නිවසේ ගුවන් විදුයෙන් ඇසෙන ගී සඳහා හුරුබුහුටිව අතැගිලි ළෙලවමින් තබ්ලාව වාදනය කරන්නට විය 
--------------------
වමේ සිට 

බර්නාඩ් සොයිසා  - ලංකා සම සමාජ පක්‍ෂය

ප්‍රවිණ සිනමාවේදී තිස්‌ස අබේසේකර

සංගීතඥ ඔස්‌ටින් මුණසිංහ

පද්ම ශ්‍රී පන්ඩිත් අමරදේව
-------------------------

මේ පුරුද්ද විසින්  ඔහුව  සිය සෙසු සගයන් අභිබව ඔසවා තබනු ලැබිය ප්‍රවිණ තබ්ලා වාදන ශීල්පී නැසිගිය විජේරත්න රණතුංග ද මෙම කලායතන සගයන් අතර කැපි පෙනෙමින් ඔස්‌ටින් හා අහිංසක තරගයක යෙදුනේය

මතු ඔහුගේ නාමය නොමැකෙන ලෙස නොමියෙන ලෙස රසික සිත් හි ලැගුම් ගන්වාලු වේදිකා නාට්‍ය සංගීතය උදෙසා හා පුරා සිය දායකත්වය ලබාදෙන්නට අවස්‌ථාවක්‌ ඔහුට උදවුයේ ද මේ යුගයේදීමය ඒ 1962  වසරේ හෙන්රි ජයසේනයන්ගේ ජනේලය වේදිකා නාට්‍යය වෙනුවෙන් තාල තරංග (තබ්ලා) වාදනයේ යෙදෙනු පිණිසය

එයින් මතු ජයසේනයන්ගේ සෙවණැල්ල ලෙස රැඳෙමින් මිතුරු දමින් බැඳී ඔහුගේ විශිෂ්ඨ නිර්මාණයන් වු තවත් උදෑසනක්‌ -කුවේණි - මනරංජන වැඩවර්ජන හරහා අතිශය රසික ප්‍රසාදය ලත් හුණුවටයේ කථාව දක්‌වා සිය වාදන මිහිර බෙදාදුන්නේය රජයේ සංගීත විදුහලේ ඔහුගේ සමකාලින සිසුවකු ව සිටි පසුව ප්‍රවිණ සංගීතවේදී නවරත්න අත්තනායකයන් කුවේණි වාද්‍ය වෘන්දයේ සිතාර් වාදකයෙකු ලෙසින් ඔස්‌ටින් හා එක්‌ව කටයුතු කලේය

මේ අතරවාරයේ සිය සිප්සතර සම්පුර්ණ කරමින් කලායතනයෙන් ඉවත්ව යන්නට ඔහුට කාලය එළඹ තිබිණි

එදා පෙරදිග සංගීතය හැදැරූ ක්‍ෂේත්‍රයේ සමකාලිනයන්ගේ රන් දෙවොළ වු අසල්වැසි භාරතය  වෙත පියනගන්නට සිතැතිව සිටිනමුදු ඊට බරපැණ සපයා උපයා ගන්නට අසමත් වු ඔස්‌ටින් ගේ ගැලවුම්කරුව වුයේ ද මිතුරු ජයසේනයන්ය 

එකී වේදිකා නාට්‍ය පෙළ මෙහෙයවු ලංකා කලා සංගමය මැදහත් වී කුවේණි ආධාර දර්ශනයකින් වහා එකී ගැටඵව විසඳාගත් ඔහු 1967 වසරේ භාරතයේ ලක්‌නව් භාත්ඛන්ඩේ විශ්ව භාරති කලා නිකේතනය ට ඇතුලත් විය

ගුණදාස කපුගේ සහ නන්දා මලනී සහ ඔහු එහිදි එකට හමු වුහ

සිදුවිය යුතු පරිදිම පෙරළා දිවයිනට පැමිණි ඔහුගේ මිළග නවාතැන වුයේ ලක්‌ දනව්වේ ගීත කලාවේ මහගෙදර වු ගුවන් විදුලියයි 

දුර්වර්ණව කඩොතොඵ ව තිබී කැපී ඔපදැමුණු මිණක්‌ බඳුව නිර්මාණ ප්‍රභාව දසත විහිදවු  ඔස්‌ටින් මුණසිංහ නම් සොඳුරු ගාන්ධර්වයා තාල වාදකයා තනු නිර්මාපකයා සංගීත සංයෝජකයා මතු නොව ගායකයාගේ දෙවැනි උපත පුණරාගමනය මෙතැන් සිට ඇරඹෙන්නේය


1967 වසර එළඹ තිබේ ඔහු දැන් දිවයිනේ අග්‍රගන්‍ය සංගීත ශිල්පීන් එකතුව එකට හමුවන ජාතික ගුවන් විදුලියේ එනම් අඵතෙන් ප්‍රතිෂ්ඨාපනය කරමින් ප්‍රතිසංවිධානයට ලක්‌වු ශ්‍රී ලංකා ගුවන් විදුලි සංස්‌ථාවේ වාදක මන්ඩලයේ සාමාජිකයෙකු ලෙස කටයුතු කරමින් සිටි

මේ 1970 වසරයි ම් තමන් හා රජයේ සංගීත විදුහලේ ශිල්ප හැදෑරූ සමකාලින සිසුවියක්‌ වූ ශිල්පිනී සුජාතා අත්තනායක ගේ සරළ ගී වැඩසටහනක්‌ පටිගත කරන්නට සුදානම්ය ඒ වෙනුවෙන් එහි නිවේදක මඞුල්ලේ නවක සාමාජික ප්‍රේමකීර්ති ද අල්විස්‌ ගේ පදපෙළක්‌ මුණසිංහයන් වෙත යොමුකරන ලද්දේ ඇගේ සැමියාණන් වු ද හිත මිතුරු නවරත්න අත්තනායකයන්ය

සංසාරිකව උරුම කරගත් ආයාසයෙන් ප්‍රගුණ කරගත් ශිල්පය වසර ගණනක අත්දැකීම් හා මුසු කරවාලමින්  නිර්මාණයක්‌ මවන්නට සුදුසු මොහොත එළඹ තිබේදිඑය නිර්මාණකරුවෙකුට සිය දිවියේ සදානුස්‌මරණිය මතක සැමරුමකි සිහිවටනයකි මේවාරයේ සිය දිවි ගමනේ නිමාව තෙක්‌ යළි යළි ලබැඳියාවෙන් සිහි ගන්වන මංගල මොහොතකි

නළලත අඩසඳ නම් වූ මෙකී කුඵඳුල් නිර්මාණයෙන් එතැන් සිට සත් වසරක අයු ලැබු ඔහු ගේ සුමියුරු ගුවන් විදුලි ගී මිණිමුතු දාමයේ උපත සිදුවිය

නළලත අඩසද එළිය සිසිල විද - ගෙවු අතීතය පෙම් සැණකෙළියේ......

අමතකදෝ - අමතකදෝ - අමතකදෝ  - අමතකදෝ.......

අතුඅග පිපුණු මලක්‌ නෙලාගෙන කුටියෙහි බඳුනක ලා.....

පරවෙන්නට ඉඩ දීදෝ කිසිවෙක්‌..... 

නොදනීදෝ නොදනීදෝ.......

මෙතැනින් සවන්දෙන්න
----------------------



ගීතය ප්‍රචාරය වන්නට පටන් ගැණිනි ඊට ලැබු රසික ප්‍රතිචාරය ඉහමත්ය

යළිත් දිනක ඇයගේ සරළ ගී වැඩසටහනකට නිවේදිකා රත්නාලංකා අබේවික්‍රම විසින් ලියෑවුනු පදපෙළක්‌ මුණසිංහයන් අතට ලැබිනි


ගීතයේ අරුතට යාවූ මුල්පදපෙළ  දැහැන් ගත වු නිසල සයුර උපමා කොට ලියෑවි තිබේ


ඈත දියඹ වැන්නේ  - ඔබ නිසසල වන්නේ...........

මෑත දියඹ වැන්නේ - වරෙක සසල වන්නේ.......

නිලඹර සාගරය සිඹින තැනකය හිනැහෙන්නේ............

මෙතැනින් සවන්දෙන්න
-------------------------

 


ංංංංංංංංංංංංංංංංංංංංංංංංංංංංංංංංංංංංංංංංං
ඉදිරි දිනක යළි මුණගැසෙමු .....................

තොරතුරු මුලාශ්‍රය සහ වැඩිදුර කියවිම


(සොඳුරු ගාන්ධර්වයා - අචිරවතී යාලගම)

ප්‍රණාම පූර්වක ස්‌තුතිය - අචිරවතී යාලගම (ඔස්‌ටින් මුණසිංහ මහත්මිය)  වෙත


ප්‍රවිණ ජ්‍යෙෂ්ඨ ගායන ශිල්පී විශ්‍රාමලත් ආචාරිනි - අධ්‍යපන අධ්‍යක්‍ෂ විශාරද සුජාතා අත්තනායක මහත්මිය වෙත.....
ප්‍රවිණ සංගීතඥ විශ්‍රාම ලත් අධ්‍යාපන අධ්‍යක්‍ෂ නවරත්න අත්තනායක මහත්මා වෙත........
වෛද්‍ය රුමල් ජයමුණි මහතා - ප්‍රේමකීර්ති ද අල්විස්‌ මුහුණුපොත් ගී රසික හවුල (නළලත අඩසද මුල් පිටපත වෙනුවෙනි)......

8 comments:

  1. "නළලත අඩ සඳ" අපූරු නිර්මාණයකි.. එහි දෙවෙනි අන්තරා කොටසේ පදපේළි ඇත්තේ තුනක් පමණි... පද රචකයාගේ ලියැවිල්ල ඒලෙසින් ම ගෙන ඔස්ටින් මුණසිංහයන් තනුව නිර්මාණය කර ඇති ආකාරය අති විශිෂ්ටය... සුජාතාවන්ගේ හඬ හා අපූරුවට මුහු වන සැක්සෆෝන නාදය පදපෙළේ අඩුව රසිකයින්ගෙන් සඟවන ආකාරය සහ එය ගෙන දෙන සුමධුර රසය විඳ බලන්නට ආරාධනා කරමි...

    https://youtu.be/kEuy02G48Fw

    ReplyDelete
    Replies
    1. ගී පද රචනයක සංගීත නිර්මාණයේ හමුවෙන සොදුරැ තැනකි මේ ........

      තමන්ගේ සිතේ ඇදි තනුවට සරිලන සේ පදරචනය සීරැමාරැ කරගැන්මෙන් වැළකි ඊට සුදුසු තනුරටාව මුසුකර ඇති අයුර සුන්දරය

      ස්තුතියි ...!

      Delete
  2. ඉතාම සවිස්තරාත්මක හරබර ලිපියක්. නොදැන සිටි කරුණුත් දැනගත්තා.
    බොහොම අගෙයි ප්‍රභාත්!

    ReplyDelete
    Replies
    1. ස්‌තුතියි රුමල් .....!

      ඉදිරි ලිපි ද පරිශිලනය කරන මෙන් ආරධනා කරන්නෙමි

      Delete
  3. ප්‍රේමකීර්ති හා ඔස්ටින් මුනසිංහ යුගලයෙන් රසවත් ගීත නිර්මාණය උනා . ඔවුන් අපට අහිමි වූයේ අපේ අවාසනාවට
    විචාරක දියණිය

    ReplyDelete
  4. මිහිරිතම තනු රැසක හිමි කරුවා." දම් පාටින් ලා සඳ බැස යනවා" සහ " පුන්සඳ රෑට ඇවිදින් හේනේ කළුව බිඳ" ඔහුගේ විශිෂ්ටතම තනු නිර්මාණ දෙකක්.

    ReplyDelete
  5. නොදැන සිටි බොහෝ කරුණු ඇතුළත්වූ ඉතා හර බර විස්තරයක්. බොහොම ස්තුතියි ප්‍රභාත් මහත්මයා 🌹

    ReplyDelete